Romssa Universitehta Árdna viesus soai beasaiga gullat sámi studeanttaid doaimmaid birra, ja sámi artista Niko Valkeapää juoiggastii.
Árktalaš gažaldagat ledje fáddán stáhtagalledeami oktavuođas.
– Gelddolaš
NRK ii beassan humadit gonagas Haraldin, eat ge Singapore presideanttain.
Dan gal beasai Valkeapää, gii maid lea Romssa Universitehta studeanta.
– Lei gelddolaš Gonagasa deaivat, ja mu mielas lei maid somá beassat ovdanbuktit sámi musihka. Mon háliidin muitalit rájihis sámi álbmoga birra, ja ahte mii ássat njeallji riikkas, ja ahte vaikko leat riikaráját dás gaskkas, de mii leat goitge okta álbmot, lohká Valkeapää.
Jođiheaddji rámis
Gonagasa ja su olgoriika guossi deaivvadeapmi sámi studeanttaiguin ii bistán gal guhkkit go badjelaš logi minuhta.
Studeanttat muitaledje earret eará iežaset oahppofálaldagaid birra, ja Sámi dutkamiid guovddaža jođiheaddji, Else Grete Broderstad lei, rámis.
– Lei miellagiddevaš čilget veaháš universitehta birra, studeanttat leat leamaš mielde plánemin dán deaivvadeami, ja mu mielas manai hui bures, lohká Broderstad.
Su mielas lea dehálaš ná beassat mielde maiddái olgoriikii čalmmustahttit sámi dutkamiid, ja sámiid sajádaga universitehtas.