Golli fas šealggáhallagoahtá Bassevuovddi bánnuin

Gollebassan gilvvut álggahuvvojit fas lávvardaga, ja lea Bassevuovddi golle ja meahcceleaira mii dan lágida.

Nils Peder Eriksen rohki dat jagis 1993 álggahii gollebassangilvvuid, muhto ovdalaš juovllaid jagis 2013 jámii son fáhkka, ja nu gaskkalduvve gilvvut.

Muhto dál, lea leaska Doris Nordby oktan bearrašiin fas čievččastan johtui golledoaluid, ja dán jagi gilvvuid leat gohčodan Bassevuovdi Memorial Safári, gudnijahttin dihte Nils Pedera.

– Joatkit dáinna maid Nils Peder rohkki álggahii addá dál munnje buorre dovdu, muitala Doris Nordby.

Buohkat gávdnet golli

Gollebassan gilvvuin Bassevuovddis lávejit buohkat geat servet gilvuide gávdnat golli. Jus it dieđe movt galggat bassat golli, de oaččot lágideddjiin veahki.

– It riggo jus vuovddát golli maid gávdnat, gollebassan lea somá dihte. Dat lea justa dego luossabivdu, čuččodat máŋggaid tiimmaid johkagáttis, iige dohppe guolli, muitala Doris mojunjálmmiid.

Gilvaleaddjit miehtá Norgga

Nordby navdá boahtit gaskal 20-30 oaseváldi lávvardaga, ja sii bohtetge miehtá Norggas, sihke Girkonjárggas, Oslos, Kárášjogas ja Tromsa suohkanis. Muhtumat dain leat jo leamaš Bassevuovddis mánu, ja leat bures ráhkkanan.

Bassevuovdi Memorial Safári gilvu álgá lávvardaga suoidnemánu 29. beaivve diibmu 13.00 ja mihttu lea lágidit gilvvu juohke nuppi jagi, loahpaha Nordby.