Speallobearráigeahčču ii suova Guovdageainnu Lagas Radio (GLR) lágidit radiobingo bábermoivviid dihte.
Sádden boasttu čujuhussii
Ášši álggii dainna go GLR ii sádden rehketdoalloskovi, maid jahkásaččat galgá sáddet Speallobearráigehččui, miessemánus diibmá. Nu mearridii Speallobearráigeahčču borgemánus ahte GLR ii beasa šat jođihit radiobingo ja sáddii mearrádusa reivve bokte GLR:ii. Muhto čujuhus masa sáddejedje dieđu lei GLR boares čujuhus ja GLR ii ožžon dán reivve goassege. Nu eai beassan sii diehtit ahte sis ii leat bingolohpi šat.
Ráŋggáštuvvojit
Go sii de ohce dán jahkái bingolobi, de biehttaluvvui ohcamuš, muhto eai dange beassan diehtit go eai ožžon reivve. Ođđajagimánus ohcališgođii GLR ieš dán vástádusa, ja de oaččui dieđu ahte ohcan lei biehttaluvvan, ja seammás ožžo dieđu ahte ráŋggáštuvvojit go eai leat sádden skovi diibmá giđđat.
Ráŋggáštus lea ahte eai beasa ohcat fas bingolobi ovdal cuoŋománu 1. beaivvi. Dát lea dagahan GLR hui váttes dillái. Jus cuoŋománu 1. beaivvi rádjai šaddet bissehit bingo, de manahit nu stuora oasi jahkedietnasis ahte soitet šaddat heaittihit olles radio.
Jus deaddelat gova, de sáhtát gullat olles ášši, mas lea jearahallan GLR váldodoaimmaheddjiin ja Guovdageainnu sátnejođiheddjiin. Sátnejođiheaddji Klemet Erland Hætta lea maid hui fuolas dili dihte masa GLR lea gártan, ja lohká lagasradio hui mávssolažžan servodahkii. Gulat maiddái maid Speallobearráigeahčču lohká GLR dili birra.
