Dan gal oaččun dadjat; mun in mana áltárii go nissonbáhppa lea áltárgárddi duohken, ja in ge mana rihpaide ge dalle, lohká Iversen.
Eai buohkat Unjár-searvegottis dohkket ođđa báhpa, danne go son lea nissonolmmoš.
Ii leat váttisvuohta
Muhto Unjárgga searvegotteráđi jođiheaddji, Kirsten Isaksen, gal ii oainne makkárge váttisvuođaid. Son muittuha ahte searvegotteráđđi lea ovttamielalaččat bidjan Petra Lihl dán virgái.
Álgá golggotmánus
Petra Lihl álgá ođđa báhppan Unjárgii golggotmánu vuosttaš beaivvi. Vaikko Isaksen lohká, ahte searvegottis illudit go leat ožžon ođđa báhpa Unjárgii, de gávdnojit maiddái olbmot geat eai dohkket nissonbáhpaid. Okta sis lea Unjárgga girkobálvá Bernhard Iversen.
Jáhkká gulahallat
Unjárgga ođđa báhppa, Petra Lihl, lea ovdalis lohkan diehtit ahte muhtimat searvigottis eai liiko nissonbáhpaide, muhto dat ii leat sutnje váttisvuohtan. Su mielas lea dehálaš ahte sii árvvusin atnet nubbi nuppi.