NRK Meny
Normal

Girječállit fállet iežaset ođđaseamos girjjiid

Marry Áilonieida Somby galgá lohkat iežas ođđaseamos girjjis, Čerbmen bizi. Iežas lohká čevllohallat go su girji lea golmma sámegillii, davvi-, julev- ja máttasámegillii ja vel dárogillii. Son sávvá ollugiid boahttit gullat girječálliid lohkamin iežaset ođđaseamos girjjiin.

Marry Ailonieida Somby

Marry Ailonieida Somby galgá lohkat iežas girjjis Čerbmen Bizi

Foto: Yngve Olsen Saebbe

Álttá girjerájus dat bovde ovttas Norsk Forfattersentrumain ja Finnmárkku Filkkagirjerádjosiin Davvi Norgga girjebeaivái dán vahkkoloahpa. Deaivvadeapmái bohtet sihke girječállit geat guhká juo leat beaggán ja maiddái sii geat aiddo leat álgán girječállin.

Muitalit maŋimus 22 ođđa girjjis

Deaivvadeamis lea sáhká 22 ođđa girjjis, čállon 19 girječállis. Dán jagi ávvuda Davvi Norgga girjebeaivi dan go girjjit leat almmustuvvan máŋgga gilli, ja ahte girjjit leat iešguđetge šáŋgáris. Ávvudit maid dan go girjjit mat maŋimuš jagis leat almmustuvvan, leat čállon sihke boarrasat- ja nuoratolbmuide.

Girjebeaivvit bearjadag ja lávvardaga

Bearjadaga 28.beaivvi lea girjjálašvuođaávvueahket, dalle deaivvadit Studeantaviesu Cafeás. Doalut leat nuvtta, muhto doppe sáhttá oasttit juoga goikui.

Lávvardaga 29. beaivvi lea ges bearaš ja ollesolbmuid prográmma, dalle deaivvadit ges Álttá girjerádjosis. Dalle dat galgá Marri Áilonieida Somby muitalit iežas girjjis, go sus lea almmustuvvan girji vássán jagis. Son sávašii ollugiid boahtit gullat maid sii leat čállán ja almmustahttán maŋimuš jagis.