Iversen ássá Vuotnabađas Unjárgga gielddas. Beaivválaččat son bargá giellakonsuleantan Isak Saba guovddážis.
2011:s álmmuhuvvui su vuosttaš mánáidgirji, «Mánugánda ja Heike», mii vel nominerejuvvui Davviriikkaid Ráđi mánáid- ja nuoraid girjjálašvuođa bálkkašupmái 2013:s.
– Vaikko in vuoitán de lei somá nominerejuvvot dohko, lohká Signe.
Dál álmmuhuvvo nubbi girji mánugándda ja Heike birra. «Mánugánda ja Heike deaivvadeaba fas» lea ođđa girjji namma.
– Govat leat dáhálaččat
Sissel Horndal, gii ássá Sørfoldas Nordlánddas, lea ges sárgon govaid Iversen ođđa girjái.
Horndal lea sárgon govaid olu sámegiel ja dárogiel girjjiide. Son lea maid ožžon ođđadárogielat mánáid girjjálašvuođa bálkkašumi «Himmelspringaren- ja Ei Hals-pastillhistorie» girjjiid ovddas.
Dasa lassin oaččui son vel 2015 Blix bálkkašumi.
– Sissel lea tevdnen ivdnás ja čáppa govaid ja govat leat dehálaččat go dat dahket muitalusa eambbo geasuheaddjin lohkat, lohká Signe Iversen.