– Dat lea váttis čilget makkár dovdu mus lea dál, go lean mearridan fas gilvvohallat, lohká Ráikku Bireha Ánte.
Vaikko lea measta 20 jagi áigge maŋemus go oassálastii Sámi Grand Prixas, de ii leat su gilvvohallanvuoigŋa jáddán.
– Mun ledjen juoiganjurys diibmá. Ja go mun oidnen fas Sámi Grand Prix lávddi, de šattái miella fas juoigat lávddis, lohká Ánte.
Vuoitán SGP guovtte háve
Ánte lea ruovttus Jergulis, 40 kilomehtara oarjjabeale Kárášjoga, go NRK Sámi journalisttat fitne su guossis. Sus lea heargi áidde siste maid son biebmá jeahkaliiguin.
Vuosttáš háve go Ánte juoiggastii sámi stuoramus lávddis beassášlávvordaga, lei jagi 1994is. Dalle son juoiggastii iežas viellja, Máhte-luođi.
Máhte-luđiin son olahii gilvvu stuoramus gutnisáji, vuosttáš saji.
Jagi maŋŋel son juoiggastii ges iežas nuppi viellja, Nils Lásse, ja dainna luđiin son vuittii Sámi Grand Prix juoigangilvvu nuppes.
Oktiibuot son lea njeallje háve oassálastan SGPas. Son lea maid olahan nuppi sáji, muhto son ii dieđe galladin son šattái njeallját háve go searvvái.
Movt don jáhkat mannat dán jagi?
– Na mun boađan hui sihkkarit logi buoremusaid searvái, vástida Ánte ja boagusta njálgat.
Ja go Ánte galgá gilvvohallat ovcciin eará juiggiiguin, de lea hui stuora vejolašvuohta ahte son deaivá iežas einnostemiin.
SGP-lávlungilvvus ges oassálastet guhtta lávlu.
- Iskka geat oassálastet SGPas: