NRK Meny
Normal

Eanandoallit masset eatnamiid

Omasvuona suohkanstivra mearridii mannan gaskavahkku ahte 30 mihtu gilvojuvvon eanabihttá juolluduvvo campingsáji doaimmaide. Guovllu boanddat leat hárbman.

Sávzaboanda, Leif-Bjørnar Seppola
Foto: Privat

Omasvuona suohkanstivra ii čuovvolan njeallje boandda cuiggodeami Strandbu Camping huksenplánaid viiddidit campingsáji eanaviidodaga.

Suhttadan boanddaid

Leif-Bjørnar Seppola

Ivgobađa sávzaboanddaid s ja earvvi jođiheaddji, Leif-Bjørnar Seppola ii liiko go dál masset badjelaš 30 mihttu gilvojuvvon eatnama campingsáji doaimmaide.

Foto: Privat

Standbu Camping lei ohcán lobi viiddidit guovllu gos galget addit vejolašvuođa ásahit eanet campingvovdnasájiid gussiide. Viiddideapmi lea sullii 30 mihttu suohkana mihttideami ektui. Ivgobađa njeallje boandda vuostildedje garrasit dán, go sin mielas ii leat riekta go suohkan dáinna lágin rivve eatnamiid eanandoalus, lohká sávzaboanda ja Ivgobađa sávzaboanddaid searvvi jođiheaddji, Leif-Bjørnar Seppola.

Seppola čilge ahte ovdal suohkanstivrra čoahkkima mannan gaskavahkku, dorjo stuorit oassi politihkkárin boanddaid. Muhto go ášši bođii ovdan de spiehkastedje nugo Guovddášbellodat ja dorjo Standbu Campingbáikki viiddidan áigumušaid. Seppola imášta manne justá Guovddášbellodat ná spiehkastii, go sii han dábálaččat bealuštit eanandoalu. Eanabihttá maid dál masset addá lagábui 150 suoidnespáppa jahkásaččat, ja dagaha čuođiduhát ruvnno táhpa sidjiide, lohká Seppola.

Eai leat čálálaš soahpamušat

Omasvuona suohkan čuožžuha ahte Ivgobađa boanddain ii leat čálálaš soahpamus eanaeaiggádiiguin go guoská eanageavaheamit, danne sáhttá suohkan addit dáid gilvojuvvon eatnamiid eará doaimmaide. Dán vuođul mearridedje juolludit sullii 30 mihttu eananbihttá Strandbu Campingsáji regulerenplánii.

Romssa fylkamánni iige leat vuostildan regulerenplána maid Strandbu Camping lea evttohan. Campingbáikki eaiggat áigu geavahit eatnama mat leat campingbáikki bálddás eanet vovdnasájiide. Sávzaboanddat eai dohket suohkanstivrra mearrádusa ja áigot guoddalit ášši, lohká Ivgobađa sávzaboanddaid searvvi jođiheaddji, Leif-Bjørnar Seppola.