Normal

Giliturismas vejolašvuođat davvin

Lulde lihkustuvvet oallugat giliturismain, muhto davvin ges leat ain unnán dákkár fitnodagat vaikko livččii stuora potensiála, lohket mátkeealáhusorganisašvunnas.

Gården Sandbu Søre Nedre i Vågå i Gudbrandsdalen
Foto: Erle Moestue Bugge / SCANPIX

Lulde leat olu fitnodagat mat náitet mátkeealáhusa oktii eanadoaluin dahje eará vuođđoealáhusain.

Loga: Dološ dállu šattai turismafitnodat

Gili- dahje boaittobealturisma lea šaddagoahtán bivnnut go olbmot ohcalit earalágan fálaldagaid go dábálaš hoteallaid. Dan vuhttet Hanen -nammasaš beroštumiidorganisašuvnnas.


Hutkás fitnodagat

Muhto organisašvunnas váillahit eanet dákkár fálaldagaid davvin.

- Mii vuohttit gal ahte dakkár giliturismafitnodagat leat lassánišgoahtán maiddái Finnmárkkus ja dat moaddása geat leat arvan bargagoahtit dáinna turistaealáhus-surggiin, leat čeahpit ja hutkát. Dan lohká Hanen-organisašvunna márkan-ja mediehoavda Ole Jonny Trangsrud. Muhto davvin livččii olu potenisála vel eanet doaimmaide.

Erenoamašvuođat davvin

Su mielas galggaše davvin leat čeahpibut ávkkástallat daid erenoamášvuođaid mat gávdnojit doppe. Sihke luonddu, kultuvrra ja historjjá dáfus lea olu potensiála. Dasa lassin galggašii su mielas sámivuođa oažžut eanet ovdan dákkár turismabuktagiin. Son maid oaidná stuora potensiála Finnmárkku erenoamáš soahtehistorjjás.

- Báikkálaš árbevieruid, namahusaid, historjja ja kultuvrra berre álo bidjat vuođđun giliturismadoaimmas, neavvu son.