NRK Meny
Normal

Giktala ođđa eaktodáhtolaš bargiid sierra gohttensajiin

Go Márkomeannu fas boahtá ruovttuluotta geassefestiválain Evenáššái ja Skániide suoidnemánu 23.- 25. beaivvi, de festivála háliida addit eaktodáhtolaš bargiide erenoamáš vásáhusa. Danne rahpojuvvo dán jagi sierra gohttensaji eaktodáhtolaš bargiide.

Eaktodáhtolaš bargit Márkomeannus

Eaktodáhtolaš bargit Márkomeannus

Foto: Márkomeannu/Ellen Berit Dalbakk

– Sidjiide guđet háliidit oažžut ođđa ustibiid eará áŋgiris eaktodáhtolaš bargiid gaskkas, jáhkkit mii ahte eaktodáhtolaččaid gohttensadji sáhttá leat buorre fálaldat. Gohttensadji lea guovddáš báikkis festiválas, ja lea vejolaš ieš tealtta cegget dahje orrut ovtta min lávuin. Dasa lassin galgá dáppe leat eaktodáhtolaš bargiid sierra lounge, muitala festiválajođiheaddji Marita Kristin Eilertsen preassadieđáhusas.

Festiválajođiheaddji muitala ahte jurdda lea ahte galgá leat buorre vásáhus bargat eaktodáhtolažžan, beroškeahttá makkár duogáš olbmos lea.

– Mii geat geavahat ollu iežamet astoáiggis lágidit festivála diehtit man somá ja guoibmái dat lea. Dasa lassin ahte oažžu nuvttá festiválabileahta go bargá unnimusat 10 diimmu, de oažžu ođđa ustibiid, ja buot deháleamos lea dat dovdu man oažžu go lea mielde ráhkadeamen juoga dehálačča, muitala Eilertsen.

Márkomeannu dárbbaša sullii 120 eaktodáhtolaš bargi vai sáhttá čađahuvvot, ja doaimmat maidda dárbbaša veahki lea sihke sáhtostallan ja ruskasirren ja bileahttavuogdin.