NRK Meny
Normal

Giitevaš go beasai Norgii

Maŋŋil 17 jagi báhtáreaddjiid-leairras Nepálas, de beasai eadni Suk Majja Rai mánáidisguin fárret Norgii. Álggos lei váttis dillli, dál lea giitevaš og lea beassan Norgii.

Nepala báhtareaddjiid leairras
Foto: Privat

Suk Majja Rai mánáidisguin
Foto: Privat

Suk Majja Rai báhtarii isidiinnis ja mánáináinnis Bhutanas Nepálii. Doppe ásai son 17 jagi báhtareaddjiid-leairras ovdal go beasai mánáidaidisguin fárret Norgii. 2008 sii bohte Norgii ja Áltái.

Ozai fárrenlobi juohke jagi

Suk Majja Rai muitala ahte son ozai fárrenlobi juohke jagi, muhto illá han dat čielggai. Son duođai ii hálidan iežas riikii Bhutanii šat, go doppe lei soahti. Dan áiggis go son ásai báhtareaddjiid leairras, de riegádahtii son vel njeallja máná.

Bhutanas fertii leat buddistta

Suk Majja Rai nieida Sahara muitala ahte Bhutanas lei soahti dalle og sii báhtaredje. Son lei dalle riegádan. Gonagas lei mearridan ahte buohkat galge leat buddisttat, ja jos eai dohkkehan dan, de geavai nu ahte nieiddat ja nissonat veagalváldojuvveje, álbmát biddjoje giddagassii ja dáluid bolde.

Doppe lei váttes dilli, danne báhtaredje sii doppe eret, iežas muitala dalle lean unna mánážin. Sahara eadni lasiha ahte jos Bhutanas gávnnahalai leat kristtalažžan, na de gal goddui. Poletiját dat bohte ja godde, jos lei kristtalaš oskku dovddastreaddjii.

Šadde kristtalažžan Nepálas.

Sii šadde kristtalažžan Nepálas. Suk Majja lei hinduoaskkolaš dalle go ásai Bhutanas.

2008 beassái bearaš fárret Norgii

2008 de oaččui Suk Majja Rai dieđu ahte son beassa fárret mánáidisguin Norgii. Dan eai duosttan sii geasage muitalit. Earát dán leairras álge dalle vašuhit sin geat besse vuolgit eará riikii. Sii guđđe báhtareaddji-leairra ihkku seavdnjadin, ja manna Katmanduii, mii lea Nepála oaivegávpot. Doppe gárte sii vuordit njeallja vahkku, ja de gal besse mannat girdái, mii doalvvui sin Norgii ja Áltái.