Giellavahku rahpan: – Boahtte jagi šaddá Romssas sámi giellafestivála

Sámi giellavahku rahpan Romssa ráđđeviesus šattai stuorra menestussan. Olu olmmoš ja buorre mokta.

Barn fra Prestvannet skole synger i åpningen av språkuka 2021

LÁVLO ČÁBBÁT: Báhpajávrri skuvlla sámegielat mánát guoimmuhedje olbmuid Sámi giellavahku rahpamis Romssa ráđđeviesus.

Foto: Dan Robert Larsen / NRK

– Dáppe Romssas mii čuovvolat dan maid Sámediggi háliida min dahkat; Mii nannet giela. Mii geahččalat iešguđetlágan doaimmaid bokte čohkket olbmuid ja dahkat sámegiela oidnoseabbon. Dalle giela árvu maid loktejuvvo.

Nu čilge Gáisi sámi giellaguovddáža jođiheaddji Niklas Labba. Giellaguovddážis ja sin ovttasbargoguimmiin leat stuorra áigumušat boahttevaš jagiid.

Niklas Labba

STUORRA ÁIGUMUŠAT: Gáisi sámi giellaguovddáža jođiheaddji Niklas Labba.

Foto: Dan Robert Larsen / NRK

– Romssa suohkan ohcala sámi giellafestivála. Dalle nagoda loktet giela árvvu go lea festivála. De oččošii mielde girječálliid, musihkkáriid, biepmomálesteaddjiid ja nu ain, čilge Labba.

– Máŋggalágán gielat

Ievttá eahkeda láidesteaddji ja astoáiggekomihkkár, Ánte Siri, muitalii gielaid iešguđet mearkkašumi vuohkkasit.

Dán leaikka áddejit dušše sámegielagat.

– Lehpetgo jurddašan maid giella rievtti mielde mearkkaša? Mishan leat nu issoras olu gielat. Mis leat rievssatgielat. Mis leat njoammelgielat. Ja, gea dá! Máilmmi stuorámus čoarvegiella. Dasa lassin leat máilmmis eambbo go čiežaduhát giela, muitalii Siri.

Ánte Siri

OLU GIELAT: Láidesteaddji Ánte Siri čájeha ovdamearkka das mii gohčoduvvo giellan.

Foto: Dan Robert Larsen / NRK

Goalmmát Sámi giellavahku rahpan Romssa ráđđeviesus lihkostuvai bures.

Sullii beannotčuođi máná, nuora, rávisolbmo ja eallilanolbmo reahttadedje, dánso ja suohtastalle ovttas.

– Sávvamis mis boahtte jagi lea iežamet sámeviessu Romssas, doaivu Labba.

Olbmot duhtavaččat

Romssa ráđđeviesus oidnojedje ikte olu moddjás gávttehasat. Mánáide lei buorre sadji viegadit.

Buohkaide ledje doarvái herskot.

Jonas Rist

DUHTAVAŠ: Jonas Rist.

Foto: Dan Robert Larsen / NRK

Váldomális lei biđus. Dasto sáhtii borrat nu olu bávkegortniid ja sohkarullu go čoavji gierddai.

– Mu mielas lea somá oaidnit nu olu gávttehasaid ja sámegiela gullat, lohká Jonas Rist.

– Buot buoremus giellavahkuin lea, ahte mii sáhttit čoagganit ja gudnejahttit giellamet. Várra eambbosat sáhttet oahppat giela, sávvá Susanna Linløkken dárogillii.

Livččiigo dus miella oahppat sámegiela?

– Juo!

Susanna Linløkken

DUHTAVAŠ: Susanna Linløkken lovttii bures Romssa ráđđeviesus ikte. Dál háliidivččii sámegiela oahppat.

Foto: Dan Robert Larsen / NRK

Alladásat guoimmuheapmi

Ievttá guoimmuhanprográmma lei girjái. Lávddi alde ledje earret eará astoáiggekomihkkár Ánte Siri, Báhpajávrri skuvlla nuorat ja ráppejeaddji SlinCraze dahjege Nils Rune Utsi.

Buohkat ásset Romssas.

– Dat gal lei hui somá. Álo lea hui erenoamáš go leat olu mánát, muhto lei hirbmat vuogas suohtastallat veahá eará láhkái maid, mojohallá SlinCraze.

SlinCraze, Nils Rune Utsi

GÁKTEHEALMMIT ŠLIVGGODEDJE: Nuorra nissonolbmot ja mánát dánsu dan botta go SlinCraze ráppii sihke iežas boares ja ođđa lávlagiid.

Foto: Dan Robert Larsen / NRK

Son nagadii bures oažžut olbmuid mielde ja erenoamážit nuorra nissonolbmuid oažžut gáktehelmmiideaset šlivggodišgoahtit.

– Mun oidnen, ahte ollugat ledje hui áŋgirat. Muhtimin olmmoš dovdá dego olbmuin livčče juogalágan suotnjarat, čilge SlinCraze.

Maid dutnje mearkkaša sámegillii lávlut?

Silje Karine Muotka

DUHTAVAŠ: Sámediggepresideanta Silje Karine Muotka.

Foto: Dan Robert Larsen / NRK

– Dat mearkkaša hui olu. Sámegiella lea mu eatnigiella ja lean masá 20 jagi bargan sámi musihkain. Danne dat mearkkaša olu, dadjá SlinCraze.

Ođđa sámediggepresideanta, Silje Karine Muotka (NSR), lei iežas vuosttaš ovddastanbarggus maŋŋá go válljejuvvui. Sutnje maid mearkkaša giellavahkku olu.

– Giellavahkku lea dakkár somás vahkku goas mii sáhttit čalmmustahttit sámegielaid juohke dásis servodagas. Olles vahku leat olu somás doalut, illosa Muotka.

Korte nyheter