– Julevsámegiela ájnna åvdåsvásstediddje oadtju sæmmi vuodojuollodimev Sámedikkes gå akta dajs gáktsa giellaguovdátjijs mij nuorttasámegielav åvdåsvásstet. Vuorddep dal diedon ienep rudájt, javllá julevsáme guovdátja direktørra Lars Magne Andreassen, ja tjieñot tsuojggidusáv.
– Julevsáme giellabargo åvdåsvásstádus la dåssju avta giellaguovdátja duogen. Nuortakgielan li gáktsa giellaguovdátja, ja oarjjelsámij gaskan li gålmmå giellaguovdátja. Huoman ep oattjo ienep vuodojuollodimev gå då nuppe sáme giellaguovdátja, juska dal aktu dahkap dav bargov majt då nuppe aktan dahki.
Andreassen ij la dudálasj gå Árrana duogen la divna åvdåsvásstádus julevsámegielas, ja e ienep rudájt dan bargguj oattjo.
– Ælla ietjá institusjåvnå ma julevsámegielajn barggá gå Árran, ja de Ájluovta skåvllå ja ájnesgis bargge iesj guhtik barggosajen. Nuorttasámegielan lij duodden moadda institusjåvnå ma barggi nuorttasámegielajn dagu dal Sámi allaskåvkllå, NRK Sápmi ja nav. Julevsámegueovlon la Árran. Duodden la dal Árranin sáme mánájgárdde, nav vaj divna giellabarggo vijmak Árranij gahttjá. Ja dat ij la dåhkkidahtte, javllá Lars Andreassen.
Andreassen oadtju dårjav sámedikkeájrrasis Lars Filip Paulsen (Oab) gen miella l de sieradit giellaguovdátjijt gielladárboj milta.
– Giellaguovdátja vierttiji sieraduvvat, ja nav ienep rudájt oadtjot dárboj milta. Sámedikken ælla guhkes ájggomusá gåktu sámegielajt nannit. Julevsámegielan li stuorra hásstalusá ja ietjá dárbo gå dåjn nuppijn giellaguovdátjijn.
Sámedikkepresidænntaj Aili Keskitalo ælla dá árvvalusá abmasa, valla sån sihtá vuostak dal Sámedikke ållestjåhkanibmáj vuordde.
– Sámedikkeráde lij tjåhkanimen Árranijn ja Divtasvuona suohkanijn bierjjedagá dán ja ietjá ássjij birra. Sámedikke la dan prosessan giellapolitihkav árvustallamin. Stuorra vejulasjvuoda lij dal sieradit jus la nav at muhtem giellaguovdátjijn li sierra dárbo ja åvdåsvásstádusá. Gatjálvis le jus oadtjop dáv tjadá ållestjåhkanimen.
Mån oajvvadav at dat árvvalus majt sámedikkeráde la åvdedam, dat vaddá buorre vuodov dan guovlluj majt Árran árvval, valla vierttip dal vuojnnet makkár boados sjaddá ållestjåhkanime giehtadallamis.
Ja dán vahko galggá Sámedikke ållestjåhkanibme dáv ássjev giehtadallat.
Lågå aj: