NRK Meny
Normal

Gielda caggadii vihtta jagi

Bárra lea hirpmástuvvan das, mo Deanu gielda lea viggan cakkadit sudno huksemis goađi máttarmáttuid goahtesadjái.

Gamme
Foto: Ove Ronny Haraldsen / NRK

Karen Inga ja Ole Varsi guovttos leaba badjel vihtta jagi dorron byrokratiija vuostá. Soai áigguiga hukset goađi Ole máttarmáttuid goahtesadjái

– Dát čájeha dan, ahte lei veara áiggi ja ruđa geavahit dasa, ahte oažžut ovdan da, ahte Deanu gieldda lea boastut bargan, Karen Inga Varsi čilge.

GULDAL: – Ii ábut vuollánit

Finnmárkku fylkkamánni lea dubmen Deanu gieldda máksit buot advokáhtta goluid. Karen Inga guovttos Olein leaba leaba golahan dán áššái oktiibuot sullii 20.000 ruvnnu.

Soai leaba badjel vihtta jagi dorron beassat hukset goađi meahccái, Borsái. Dán seamma sajis Ole máttarmáttuin lea leamaš goahti.

Álggos Deanu gielda biehttalii addimis huksenlobi. Maŋŋá go gielda masá gárttaid diggái, de rievdadii oainnus.


Dasto gielda biehttalii máksimis áššegoluid, muhto dál dat ferte vuollánit maid dán áššis. Karen Inga Vars gii ieš lea gielddapolitihkkár, háliida almmuhit dán ášši, go doaivu earáid oahppat ahte lea ávki doarrut rivttiideaset ovddas.

– Jos eai oro ieža ipmirdeamen, de berrejit ohcat veahki, Vars ávžžuha.

Deanu gieldda ráđđealmmái Jørn Aslaksen, lohká gieldda áigut doahttalit fylkkamánni mearrádusa.