Magihkalaš konsearta Áillohačča gudnin

Les på norsk

– Munnje lei áibbas erenoamáš beassat vásihit dán konseartačájálmasa. Dát mearkkaša olu sihke munnje ja dán uhca biigái, gii lea Áillohačča birra oahppan skuvllas. Konsearta lea dehálaš sihke sápmelaččaide ja earáide dáppe, lohká Aile Hætta Kuhmunen duhtavaččat.

Su mielas Nils-Aslak Valkeapää dahje Áillohaš musihkka addá olu maiddái 20 jagi maŋŋá go son eretvádjolii.

– Mun njuorrasin veaháš konsearttas. Musihkka addá munnje hirbmat buori dovddu, čilge Hætta Kuhmunen.

Gudnejahttet sámi máŋggasuorggatdáiddára

Beaivváš Sámi Našunálateáhter ja Árktalaš simfoniija leat ovttas musihkkačálliin Frode Fjellheimain ja solisttaiguin Adrian Angelicoin ja Ulla Pirttijärvi-Länsmanain ráhkadan konseartačájálmasa «Beaivi, áhčážan. Eanni eannážan»

Čájálmas gudnejahttá Áillohačča 20 jagi maŋŋá go son eretvádjolii. Álgočájálmas lei duorastaga eahkedis masá áibbas dievva Stormen kulturviesus Bådoddjos. Dasto čájehuvvui čájálmas Romssa kulturviesus bearjadaga. Sotnabeaivve dat oidno Oslo Operaviesus.

– Hirbmat stuorra dáhpáhus dán beassat vásihit. Mun lean guhká dáinna bargan. Áibbas erenoamáš dát go simfoniija ja solisttat barget ovttas, dadjá Frode Fjellheim.

Áillohaš gohčodii luođi sámiid klassihkalaš musihkkan. Ođđaseamos musihkainis son čájehii mo luđiin sáhttá dahkat seammá go klassihkalaš musihkain guhkkodaga, intensitehta ja temáhtalaš molsašumiid bokte.

– Mun lean gullan olu luđiid maid Áillohaš lea čállán. Dán prošeavttas lean eambbo dovddiidan su teavsttaide ja divttaide. Dat movttiidahttet mu seammá olu go su luođit, čilge Fjellmheim.

Adrian Angelico: – Frode Fjellheim lea «noaidi»

Solisttat leaba mezzosoprána Adrian Angelico ja sápmelaš artista Ulla Pirttijärvi-Länsman.

– Dát lei nu erenoamáš buorre go sáhtášii leat. Hirbmat vuogas go luohti, simfoniijajoavku ja sámi musihkka leat ovttas. Frode Fjellheim lea albma «noaidi». Dat heivejit bures oktii. Danne dovddan dakkár alla dovddu ja mus lea dakkár mielahis oarrienergiija, dadjá Adrian Angelico ja mojohallá.

Ulla Pirttijärvi-Länsmanas lea seammá dovdu čájálmasa maŋŋá.

– Fiinnis. Hirbmat fiinnis. Áillohaš dagai stuorra ja mávssolaš barggu sámi servodahkii. Danne lei áigi ráhkadit dákkár čájálmasa simfoniijai, dadjá Pirttijärvi-Länsman.

Čájálmasas lohke Beaivváš Sámi Našunálateáhtera neavttárat Egil Keskitalo, Mary Sarre, Iŋgor Ántte Áilu Gaup ja Nils Henrik Buljo Áillohačča teavsttaid.

– Áillohaš lea ofelaš midjiide geat bargat dáidagiin. In jáhke leat nu galle sápmelačča geat eai movttiidahtto su musihkain, oaivvilda Mary Sarre.