Ikte lei erenoamaš heajos dálki Báhcavuonduoddaris, Nuorta-Finnmárkkus. Garrá biegga ja borga dagahii ahte biilajohtolat bissehuvvui Báhcavuonduoddara badjel.
Vahkku guhkkit giđđajohttin
Raggonjárgga boazodoalloorohat maŋŋonii giđđajohtimin vahkkuin hajus dálkki geažil. Dábalaččat lávejit ádjánit vahkku johttit Buolbmágis njárgii. Jođidettiin lea leamaš heajos dálki, borga ja biekkat. Sii šadde jođidettiin guođđit moadde čuođi bohcco, ja dál leat oččodeamin daid mearragáddái. Ikte lei erenoamaš heajos dálki, sláhtti, borga, stoarbma muitala Frode Utsi.
– Sii leat vahkku guhkit ádjánan johtit Buolbmágis njárgii, heajos dálkki geažil, borga ja biekkat meastá čađat jođidettin. Dál manái guokte vahkku. Juovlavuona bokte álge álddut guoddit, ja šii šadde guođđit moadde čuođi bohcco dohko, lohká Frode Utsi.
Luottat giddejuvvon
Ikte lei beanta stoarbma, sláhtti muhttun guovlluin Nuorta-Finnmárkkus, ja dasa lassin
vel borga mii dagahii ahte šadde giddet luotta Báhcavuonduoddaris. Frode Utsi muitala ahte lei nu vearrái ahte biillat eai beassan mátkoštit, ja sii maid eai sáhttán gal olus guođohit ealus go buot lei vielgadin ja geamadat borggat.
Dál guottet aiggi ii leat nu buorre dákkár heajos dálkkit, eat beasa čuovvut ealu ja mii dáhpahuvvalohká Utsi.
– Buorre bealli go dákkár heajos dálkkit lea, de goit goaskinat eai leat bahát. Nuppi bealis sáhtet galbmot miesit, mat riegádit dál. Dál lea issoras galmmas, buoláš, ille beaivet ge ligge. Muhttu lihkkus leat bievlat mearrágáttis gos dat eanaš eallu lea, lohká Utsi.
Ii leat vásihan dákkár dálkki ovdal
Dábálaš dán muttus lávejit moadde beaivvi heajos dálki, muhto Frode Utsi ii leat vásihan ná vearras dálkki ja mii lea bistán moadde vahkku. Lean lohkán dákkár dálkki dološ historjjas, muhto ii fal ná guhká borgá moadde vahkku. Dán guovllus badjosin lea aibbas vielgat, soames bievlat leat gal johka- ja mearragáttis, lohká Utsi