NRK Meny
Normal

NRK sádde vahkkosaš prográmma giđđajohtimis

Muittát go Hurtigruten minutt for minutt? Giđđat beasat TV:s oaidnit Giđđajohtima minuvttas minuktii, ja prográmmas lea boazu mearrideaddjin.

Giđđajohtin 2016 Bávttajogas Fálai.

GIĐĐAJOHTIN: Filbmejuvvon diimmá giđđajohtimis, mas NRK lei fárus. Filbmen ja čuohppan: Bengt Roger Kåven.

Juohke giđa johttájit siiddat guottetbáikkiide ja geasseorohagaide. Dán jagi lea gehččiin vejolašvuohta TV ja neahta bokte čuovvut giđđajohtima, go NRK sádde dan njuolgga minuvttas minuktii. Sullii vahku besset geahččit čuovvut Fálá ealu, go johtet dálveorohagas Bávttajogas geasseorohahkii Fálái.

–Cuoŋománu 18. beaivvi johttát, jus ealáhat, siivu ja dálki leat min bealde, muitala Edmund Johannes Grønmo, NRK Sámis.

Johtingeaidnu - Flytteleie

JOHTINGEAIDNU: Lea sulli 170 kilomehtera dálveorohagas Bávttajogás geasseorohahkii Fálái.

Foto: NRK Sápmi

Grønmo lei mannan giđa Fálá orohaga ovdaolbmo Aslak Ante Sara mielde giđđajohtimis.

– Mii áigguimet iskat vuosttažettiin leago dán sáddaga obage vejolaš čađahit. Dat galgá njuolgga sáddejuvvot sullii vahku duottarmáilmmis. Doppe ii leat buot sajiin sáddenoktavuohta, ja dat lea mu mielas stuorámus hástalus dán prošeavttas. Dáinna leat ain bargame, dadjá Grønmo.

Bohccot livvájit

BOAZU MEARRIDEADDJIN: -Mii čuovvut bohccuid, dat leat mearrideaddjit prográmmas, dadjá Edmund J Grønmo.

Foto: Edmund J Grønmo / NRK Sápmi

Dákkár erenoamáš prošeakta gáibida sierralágan čovdosiid.

– Mis galget dronekámerat leat fárus, ja ovdalaš juovllaid leimmet iskame mo Fálá bohccot láhttejit go dakkár boahtá girddi. Mii leat maid hutkame mo sáhttit ovdamearkka dihte láidestanheargái bidjat kámera, sáhttitgo juogaládje leaŋggaide bidjat gitta smávva kámeračča, muitala Grønmo.

Portrett Edmund J Grønmo

TEKNIHKKALAŠ ČOVDOSIID HUTKAME: NRK Sámi Edmund Johannes Grønmo. (Vuorkágovva).

Foto: Jon-Annar Fordal / NRK

Hiljes-TV imaštahttá

Minuvttas minuktii TV-prográmmaid gohčodit hiljes-TV:n. 2009 sáddejuvvui vuosttaš prográmma dán hámis, nammalassii "Bergensbanen minutt for minutt". NRK Hordalándda govvejeaddji Thomas Hellum gohčoduvvo hiljes-TV áhččin.

Thomas Hellum

HILJES-TV ÁLGGAHEADDJI: Thomas Hellum.

Foto: Ole Kaland / NRK

– Hiljes-TV jurdda riegádii NRK boradanlanjas Bergenis. Álggos áigguimet radioprográmma dahkat ná, muhto das ii šaddan mihkkege. Dasto suokkardeimmet makkár muitalusaid sáhttit muitalit dán hámis TV:s, ja dat evttohusat maiguin reaškkeheimmet veahá, go orro nu veadjemeahttumat, daid mii leat ráhkadan. Eat lean vuordán ahte dása šaddá ná stuora beroštupmi Norggas. Ja miehtá máilmmi imaštit dán vuogi mo ráhkadit TV, dadjá Hellum.

"Bergensbanen minutt for minutt" rájes lea NRK buvttadan vel 15 prográmma, main geahččit besset vásihit dan mii dáhpáhuvvá dalle go dáhpáhuvvá njuolggosáddagis.

Vuojahit nuori badjel

VUOJAHIT: Fála orohat vuojahit ealu badjel nuori geasseorohahkii.

Foto: Edmund J Grønmo / NRK Sápmi

– Giđđajohtin heive hui bures hiljes-TV hámis čájehuvvot. Geahččit besset mielde dán erenoamáš mátkái TV-bokte, dat lea ráfálaš ja seammás sáhttá vaikko mii dáhpáhuvvat. Ii dáidde gal dáhpáhuvvat olus mihkkege, nugo eallimisge ii daga, ii álo leat nu olu mii dáhpáhuvvá. Muhto ii goassege dieđe vissásit, ja dat lea hiljes-TV, dadjá Hellum.