– Bijaimet kámeraid čáhcái buori áiggis ovdal go dulvvai. Muhto go de vuos dulvvai, de lei nu garas ahte njeallji kámeras, de nágodii dulvi bilidit golbma dáin.
Lea suomabeale Luondduresursainstituhta mii lea dán dáhpáhusa birra čállán Deanučázádaga guolástushálddahussii (olgguldas čujuhus).
Dát boahtá ovdan e-poasttas maid NRK lea beassan lohkat.
Oktiibuot njeallje čázevuol-kámera biddjojit jahkásaččat filbmet luosa mii goargŋu Lákšjohkii.
Kámeragoziheapmi geavahuvvo luossalohkamii ja -dutkamii.
Eahpidit luohttevašvuođa
Deanučázádaga álbmotčoahkkimiin lea boahtán ovdan ahte moadde luossabivdi eahpidit ahte sáhttá ollásit luohttit kámeragoziheapmái.
– Eat jáhke manahan olu luosa, go instituhtta ovddasteaddjit fitne divvumin kámeraid dušše beannot vahku maŋŋá go dulvi daid bilidii, čállá Luondduresursainstituhtta.
Geassemánu 13. beaivi ledje fas kámerat divvojuvvon.
Buoremus luossajahki guhkes áigái
Instituhta dutkit rapporterejit leat lohkan 1076 luosa, ja badjelaš 2727 luossaveajeha Lákšjogas diibmá geasi, kámeraiguin veahkkin.
– Dát čájeha ahte 2014 lei Lákšjoga buoremus luossagoargŋunjahki 2009 rájes, čállá instituhtta.
Deanučázádaga kámeralohkan- ja luossagoddinstatistihkkat ii leat vel almmuhuvvon, mannan geasi ovddas (olgguldas čujuhus).