Seammás čájehuvvo ahte Finnmárku lea dat fylka gos unnimus priváhta olbmuin lea govdabáddi Norggas. Bredbånd Finnmark stivrrajođiheaddji ja fylkaráđđi Kåre Simensen lohká olbmuid ain šaddat vuordit, go priváhta olbmot eai vuoruhuvvo.
Go fibergovdabáddi huksejuvvo Finnmárkui, de leat vuosttažettin almmolaš ásahusat mat ožžot govdabátti, sii eai sáhte lohpidit buot priváhta olbmuide govdabátti, čilge Simensen.
Sirpmálaš vuorddašan
Son lohká eatnašiin leat muhtin lágan govdabátti maid priváhta fitnodagat leat fállan.
Sirpmálaš Johannes Varsi lea jagi vuordán govdabátti. Son lohká priváhta fitnodaga dieđihan ahte govdabáddi lea boađi boađi. Dattege lea su mielas heitot go Finnmárkolaččat eai beasa fibergovdabátti geavahit.
Unnimus govdabáttit Finnmárkkus
Seammás go Bredbånd Finnmark ikte almmuhii ahte Finnmárkui huksejit fibergovdabátti boahtte jagi, de almmuhii Statistihkkalaš Guovddášdoaimmahat ahte Finnmárku lea dat fylka gos unnimus priváhta olbmuin lea govdabáddi olles Norggas.
51 proseantta fylka ássiin lea govdabáddi, Simensen lohká sivvan dása leat fylka guovlluid ja ekonomija.
Johannes Varsi Sirpmás ii leat hirpmástuvvan go Finnmárku lea dat fylka gos unnimus priváhta olbmuin lea govdabádd.
Ii dieđe goas
Dasa goas buohkat Finnmárkus ožžot govdabátti ii gávdno vástádus.
Bredbånd Finnmark stivrrajođiheaddji ja fylkaráđđi Kåre Simensen lohká olbmuid fertet vuordit. Fitnodagat mat galget bidjat govdabáddefirpmiid fertejit sihkkarasttit ahte guovlluin leat doarvái geavaheaddjit, čilge Simensen.
