Hopp til innhold

Čuojaheaba Riddu Riđus geasset

Riddu Riđđu-festivála leat juo almmuhan joavkkuid Arvvas, Nanook ja Resirkulert mat leat gergosat čuojahit festiválas dán geasi.

Arvvas

Sara Marielle Gaup Beaska ja Steinar Raknes leaba bargagoahtán ovttas. Joavkku namma lea Arvvas.

Foto: Lars Opstad

Joavku Arvvas lea ođđa musihkalaš ovttasbargu juoigi Sara Marielle Gaup Beaska ja bassista ja lávlu Steinar Raknes gaskkas.

Ovttas ráhkadeaba musihka mii vuolgá jazzas, juoigamis ja americanas.

– Go gulaimet ođđa ovttasbarggu birra guovtti nie hárjánan musihkkára gaskkas go Steinar ja Sara Marielle leaba, de diđiimet dakkaviđe ahte heiveba juste Riddu Riđđui, čilge festiválahoavda Karoline Tveitnes Trollvik preassadieđáhusas.

Festiválii boahtá Arvvas olles čuojahanjoavkkuin.

«Nanook»

Nanook

Nanook

Foto: Steen Olsen

Jagis 2010 čuojahii Kalaallit Nunaata dahje Ruonáeanan-joavku «Nanook» vuosttaš geardde Riddu Riđus, ja iežas energiijain ja ságain illudahtte guldaleddjiid Riddus.

Dál boahtá joavku fas Riddui. Joavku lea aitto almmuhan ođđa skearru, man musihkkaárvvoštallit sakka rámidit.

– «Nanook» lea viežžan duvdosiid Kalaallit Nunaata luonddus ja birrasis. Identitehta lea dehálaš bártniide ja sii lávlot eatnigillii, muitala Trollvik.

Resirkulert

Resirkulert

Foto: Ida Skoglund

«Resirkulert»

Festiválii boahtá maid nuorra joavku «Resirkulert», mii lea válljejuvovn čuojahit by:Larmas njukčamánus.

Joavku lea Omasvuonas eret.

– Mii illudit ovdanbuktit joavkku iežamet stuora lávddis. Dál lea joavku duođai gearggus dasa. Min mielas lea somá go čállet lávllateavsttaid iežaset suopmana mielde ja olbmot sáhttet vuordit movttegis rocka dáin nuorra taleanttain, lohká festiválahoavda Karoline Tveitnes Trollvik.

Riddu Riđđu 2015 lágiduvvo Olmmáiváikkis Gáivuonas suoidnemánu gávccát gitta guoktenuppelogát beaivái.

Korte nyheter

  • Lobiheamet bivdán gonagasreabbáid

    Riddobearráigeahčču lea váidán moaddásiid go leat lobiheamet bivdán reappáid Ruovdevuonas Mátta-Várjjagis. Nu boahtá ovdan maŋŋá go čađahedje bivdobearráigeahčču vuossárgga. Riddobearráigeahčču muitalii ieš áššis Twitteris. Riddobearráigeahčču duoguštii oktiibuot 21 gonagasreabbá bivdosiid ja badjel 700 gonagasreabbá luitojuvvojedje fas merrii.

    Beslaglagt krabbetein i Jarfjorden i Sør-Varanger
    Foto: Kystvakta
  • Ollugat jápmán johtolatlihkuhisvuođain

    Norggas leat 80 olbmo jápmán johtolatlihkuhisvuođain dássážii dán jagi. Dat lea seamma ollu go diibmá obalohkái.

    Dušše miessemánu rájes leat 56 olbmo duššan johtolatlihkuhisvuođain Norggas, čállá VG áviisa.

    2020:s dušše 93 olbmo johtolatlihkkosvuođain Norggas. 2018: ja 2019: dušše fas 108 olbmo.

  • Borramušgálvohattit lassánan eanet go goassige ovdal

    Borramušgálvohattit leat lassánan 10,4 proseantan maŋimuš jagi. Nu čájehit Statistihkalaš guovddášdoaimmahaga logut. Ná olu ii leat lassánan goassige ovdal. Diibmá geavahii njeallje olbmo bearaš badjel 11.000 kruvnna borramuššii mánnosaččat. Dán jagi dát supmi lassána 1000 kruvnnain.