NRK Meny
Normal

Geassemánus dollo Veijo Länsman muitokonsearta

41 jagi dassái heavvanii Veijo Länsman. Su muitun lágiduvvo geassemánus konsearta.

Veijo Länsman

Veijo Länsman lei nuorra musihkkar, guhte heavvanii dušše 23-jahkásažžan suoidnemánu 16. beaivve 1974.

Foto: Dáidaga ovddidanguovddáža Lappi doaibmabáiki

1970-vuođđalogus su dovde vuosttaš sámi rockártistan, ja son buvttii sámemusihka ođđa dassái.

Sus báhce olu čáppa sánit ja lávlagat árbin. Ja danne háliidit gudnejahttut su muitokonsearttain.

Konseartta ártisttat bohtet Länsmana ruovttuguovllus Deanuleagis.

Deanuleagi ártisttat

Länsmanna áigge ártisttaid ovddasta Ámmun Johnskareng Kárášjogas. Son lei maid okta dain beakkáneamos ártisttain go sámi Populáramusihkka ovdánišgođii 70-vuođđalogus.

Johnskarenga mielas Veijo musihkka ja teavsttat váikkuhedje olu sámi servodahkii ja musihkkamáilbmái dien áigge.

Johnskareng ráhkadii teáhterčájalma Veijo Länsman eallimis Beaivváš sámi našunála teáhterii jagis 2004.

Niillas Holmberg

Niillas Holmberg.

Foto: Dan Robert Larsen / NRK

Niillas Holmberg lea buktan Veijo Länsman lávlagiid dálá áigái. Muitokonsearttas son ovddasta nuorra sámi ártisttaid.

– Munnje Veijo Lansman musihkka lea mearkkašan olu. Ja mun dovddan Veijjo lávlagiid sániide lagašvuođa ja na mu mielas dáid lea lunddolaš lávlut, lohká Holmberg.

Veijo Länsman muitokonsearta lágiduvvo bearjadaga geassemánu 12. beaivve Deatnogáttis, Vuollegeavgŋás, Ohcejogas.

Konseartta lágidit ovttasbarggus Dáidaga ovddidanguovddáža Lappi doaibmabáiki, Sámi Siida rs, Yle Sápmi, Sámedikki Sámemusihkkaguovddáš ja Ohcejoga gielda.

Eará artisttait leaba Hildá Länsman ja Áile Risten Holmberg. Konseartamusihkkárin doibmaba Oula Guttorm ja Roope Mäenpää.

Solju, Ulla Pirttijärvi-Länsman og Hildá Länsman

Hildá Länsman (olgeš bealde) lea maid mielde muitokonsearttas. Dás son lea ovttas etniinis Ulla Pirttijärvi-Länsmanain.

Foto: Vesa Toppari / Yle Sápmi