NRK Meny
Normal

Gearggus ságastallat SGP-ovttasbarggu birra

– Lea movttiidahtti gullat ahte Sámi Grand Prix-lágideaddjit háliidit NRK Sámi mielde musihkkadoaluide Guovdageainnus. Nu dadjá NRK Sámi direktevra Mona Solbakk, maŋŋil go Sámi musihkafestivála bealis háliidit ovttasbarggu NRK Sámiin.

Mona Solbakk

NRK Sámi direktevra Mona Solbakk

Foto: Privat

Dán jagi ii sáddejuvvo SGP njuolga radios, iige neahtas, nu go láve. Sámi musihkkafestivála buvttadeaddji Nils Johan Vars sávvá ahte lea dušše dán jagi ahte SGP ii gullo dobbelii Báktehárjji.

Nils Johan Vars

Sámi musihkkafestivála buvttadeaddji Nils Johan Vars

Foto: Kjell Are Guttorm / NRK

Sávvet ovttasbarggu NRK Sámiin

– Mun sávan ahte mii dás duohko nagodit čohkket olbmuid ja resurssaid mat galget nagodit dán buvttadit vai lea albma buorre radios, ja vaikko neahtasge. Muhto mii fertet oažžut sadjái guhkit áigge šiehtadusa, gos galgá sadji buoridit juohke jagi. Nu go mun oainnán, de lea mu mielas NRK Sámis seamma stuora geatnegasvuohta buvttadit SGP sihke TV:i ja radioi, go Sámi musihkkafestiválas lea sihkkarastit ahte dat galgá álbmogii gullot, lohká Vars NRK Sápmái.

Son oažžu doarjaga Sámi musihkkafestivála stivrra várrelahtus Heaika Hættas. Son dajai lávvordaga Ávvirii ahte sii galggaše oažžut NRK Sámi mielde beassážiid musihkkadoaluide Guovdageainnus, go SGP lea ávkin NRK:ii ođđa lávlagiid ja luđiid dihte mat almmuhuvvojit SGP dihte.

– Jus Sámi Grand Prix galgá bistit, de ferte NRK mielde doarjume, logai Hætta Ávvirii ja geassá ovdan ahte NRK:s lea stuora oassi Norgga musihkkadáhpáhusain, ja oaivvilda ahte seammaládje galggašii sámi doaluin leat mielde.

– Fertet beassat váikkuhit sisdollui

– Mu mielas lea hui movttiidahtti gullat ahte háliidit NRK Sámi mielde, ja NRK Sápmi gal lea gearggus ságastallagoahtit musihkafestivála lágideddjiiguin movt mii sáhtášeimmet nannet sámi musihka obbalohkái, dadjá NRK Sámi direktevra, Mona Solbakk.

NRK Sápmi lea ovdal ovttasbargan Sámi musihkkafestiválain, muhto geassádii doaluin 2014:s.

– Mun in lean dalle hoavdan, inge dieđe buot detáljaid. Muhto dieđán ahte mii eat beassan dalle váikkuhit nu ollu sisdollui movt SGP galgá leat. Mii leat gergosat váldit dakkár rolla gos mii leat mielde váikkuheame ja nanneme kvalitehta, muhto dat mearkkaša ahte lágideaddjit fertejit rahpat dan vejolašvuođa ahte mii duođai beassat váikkuhit. Mii eat hálit leat mikrufuvdnastatiivan, mii háliidit váikkuhit ahte dát duođai ovddida sámi musihka olles Sápmái, iige dušše uhca guovllužis, lohká NRK Sámi hoavdan Mona Solbakk, gii dál vuordá bovdejumi Sámi musihkkafestiválas ságastallamii.