Dán ráiddus lea filbmadahkki Lisa Marie Kristensen čuvvon guokte pára geat galget náitalit.
Vuosttaš oasis deaivat Sara Máreha ja Kjell Magne geat vuordiba badjel 1000 guossi heajaide Guovdageainnus. Lulli-sámis fas vuordá Conny, gii galgá náitalit Lena-Marien, oažžut iežas vuosttaš gávtti ja maid šaddat ollislaš oassin Lena-Marie bearrašis.
Ráhkisvuohta
– Mun hálidin čájehit mot heajat leat dáppe Sámis, muhto maid mot ráhkisvuohta lea sápmelaččaid gaskas, lohká Lisa Marie Kristensen.
– Munnje lea leamaš dehálaš muitalit dán nu ahte šaddá somá maiddái miidjiie geat diehtet mot heajat Sámis leat. Dan dihte mearridin ahte filbma ii šatta dušše heajaid birra, muhto ráhkisvuođa ja dovdduid birra maid.
Olbmot liikon ráidui
Ikte oidnui vuosttaš oassi SVT:as, ja Kristensen muitala ahte lea ožžon dušše fal buriid reakšuvnnaid gehččiin.
– Nu somá oaidnit ahte ollusat leat liikon ráidui, lean ožžon olu SMS:aid ja dieđuid Facebookas olbmuin geat leat oaidnán ráiddu. Sii lohket ahte dá lei juste dat maid dárbbašeimmet oaidnit, lohká Kristensen.
Dás sáhtát geahččat vuosttaš oasi: