Ina Tretnes (24) áigu čájehit mo hállemasáiggi sáhttá vuoidat muođuid. Son lea ovdagihtti jo smiehtadan makkár hápmái galgá ráhkadit dan olbmo gean áigu vuoidat.
Áddjás bargu
Dákkár vuoidan maid Ina lea oahppamin lea áddjás bargu. Dušše vuoidan ádjána 2-3 tiimma. Dasa lassin vel ádjána ráhkadit buot ávdnasiid mat adnojiit.
Guhkes beaivvi ádjánii rahkadit čorvviid maid áigu bidjat NRK Sámi oahppahallái Linii.
– Mun lean dákkár vuoidamis beroštan jo dalle go vázzen nuoraidskuvlla. Mun álgen dalle jo eksperimenteret ráhkadit efeavttaid, dadjá Ina.
– Mun liikon efeaktavuoidamii go ferte leat nu dárkil, pirkete. Ii galgga oidnot ahte lea ráhkaduvvon ovddamearkkadihtte čoarvi.
Máilbmái
Ina áigu dáinna vuoidamiin álgit bargat. Danne lea lohkamin bachelora Westerdals Oslo ACT:s mii lea dáidda, gulahallan ja teknologálaš állaskuvla. Son lohká alddis leat ollu válljenvejolašvuodaid go geargá skuvllas. Sihke teáhteris, Tv:s ja filmmain dárbbašit olbmuid mat máhttet geavahit spesial-efeavttaid.
– Mun jáhkan álgit bargat Tv:s dahje filmmain go doppe dárbbašit eanemusat diekkár erenomáš vuoidamiid. Álggán Norggas, ja de beassá oaidnit gosa máilbmái de manan, lohká Ina.