NRK Meny
Normal

Geahččalit unnidit skohterbárttiid

Nunavikas Davvi-Kanadas bártidit nuorat dávjjimusat skohtervuodjimiid oktavuođas. Danne lágidit jahkásaččat čalmmustahttima skohtervuodjinsihkkarvuođa birra mii bistá vahku

Skuter

Otne álgá Nunavikas Davvi-Kanadas jahkásaš skohtersihkkarvuođačalmmustahttin, oažžun dihte nuoraid leat eanet várrugasa go vudjet dákkár fievrruin. Vuojánat mat oidnojit dán govas leat govviduvvon Norggas.

Foto: Bernt Olsen / NRK

– Lihkuhisvuođat dáhpáhuvvet go nuorat vudjet oaivesuoji haga, sii vudjet oaivvesvuođas ja dasa lassin lávejit nuorat bahkket ollugat seamma vuojána ala, lohká Marie-Eve Marchand, NunatsiaqOnline neahttasiidui.

Son dat jođiha skohtersihkkarvuođačalmmustahttima Nunavik guovlluráđđehusa ovddas. Nunavik mearkkaša inuihttagillii min eana, ja guovlu lea davvin Quebec provinssas Kanadas.

Buot čoahkkebáikkiide Nunavikas leat eiseválddit sádden diehtojuohkinčállosiid maid vuođul báikkálaččat lágidit doaimmaid oahpahan dihte nuoraide man váralaš muohtaskohterjohtolat sáhttá leat jos sihkkarvuođa ii váldde duođas.

Loga eambbo dán čalmmustahttima birra dás: « On the right path »

Govvagilvu

Dán jagáš sihkkarvuođačalmmustahttin Nunavikas álgá odne, ja nuorat ávžžuhuvvojit searvat gilvui gos govaid bokte čájehit movt sii buoremusat eastadit bártideames skohtermátkis.

Gieskat duššai 22-jahkádaš nieida skohterlihkohisvuođas Nunavikas. Su viellja, guhte lei vuodjimen skohtera, lea áššáskuhtton go politiijat oaivvildit su leat vuodján váruhisvuođas.

Badjel 1000 bártti jahkásaččat

Olles Kanadas bártidit jahkásaččat sullii 1000 olbmo muohtaskohterjohtolagas, čájehit Kanada dearvvašvuođaeiseválddiid logut.

Norggas ii gávdno almmolaš registar das man ollugat bártidit dahje duššet skohterjohtolagas.

Logut maid Nordlys áviisa lei čohkken almmuhuvvon bárttiin jagi 2000 rájes mannan giđa rádjai, čájehit ahte lagabuid 40 olbmo Romssas, Finnmárkkus ja Sválbardas leat duššan dákkár lihkohisvuođain.