NRK Meny
Normal

Gávvilvuođainnis birgeha girjji váldopersovdna heakkas

"Silbamánnu" lea mánáid- ja nuoraidgirji, mii gieskat lea almmustuvvan. Girjjis lea gelddolaš muitalus, muitala girječálli Sissel Horndal.

Sissel Horndal girjjiinnis
Foto: ČálliidLágádus

( Ášši vuolimusas dán siiddus/ lydfil nederst på siden)

Sissel Horndal lea girječálli, gieskat almmustuvai sus girji, man nama lea "Silbamánnu". Girjjis čállá son gelddolaš muitalusa, ja govaid lea ieš sárgon.

Girječálli, govvadáiddár ja gráfalaš hápmejeaddji

Girječálli Sissel Horndal ássá Murggosvuonas,dárogillii Mørsvikbotten Nordlánddas. Son lea riegádan 1970 ja son lea dáiddárin oahppan Bergena dáiddaallaskuvllas/ Kunsthøgskolen Bergen ja Nordlándda dáidda ja filbmaskuvllas/ Nordland kunst- og filmskole, Kabelvågas Lofoahtas. Son lea govvadáiddár, gráfalaš hápmejeaddji ja girječálli.

Horndal bargá iešguđetgelaganaš bargguid, hápme govaid girjjiide, njuohtá maid govaid ja čállá teavsttaid. Ja go lea čállán girjjiid mánáide, de hápme maid ieš govaid girjjiide.

«Silbamánnu» lea Horndal ođđa girji

Sissel Horndal girji davvi sámegillii

Sissel Horndal girji davvi sámegillii, muhto dát lea maid almmustuvvan julev- ja máttasámegillii.

Foto: ČálliidLágádus

Girji mii sus dál lea gárvánan, das leat govat juohke siiddus. Son lea ieš čállán muitalusa ja sárgon govaid. Govaiguin muitala osiid muitalusas, dalle ii dárbbaš dasa šat čállit maidige. «Silbamánnu» lea girjji namma, das lea sáhka nieiddas gii gal lea iešbirgejeaddji, son lea hutkái ja gávvil.

Son lea de okto guođoheamen bohccuid, ja áigegollun botná árppu. Botnimin leage go imašlaš čuovga ihtigoahtá, ja lahkanišgoahtá. Deba dáhppáhuvváge juoga mii dagaha ahte nieida fuomáša juoga leat váralažžan, son diške čázii dollii vai jáddá.

Su áhčči gii lea guhkelis guođohan goađis, cákŋala justa dalle goađis olggas, ja songe áicá imašlaš čuovgga.

Silbamánnu lea njeadjan, ja son diehtá ahte stállu ii oađe dalle go Silbamánnu šearrá. Áhčči suorgana go fuomáša nieiddas leat okto guođoheamen bohccuid. Diehtá nieidda dál fáhtehallat stállui.

Girji álmmustuvvan njeallji gillii

Girječálli Sissel Horndal illuda go girji lea gárvánan, ja buot buoremussan lohká leat dan go girji lea almmustuvvan dáro-, davvi-, julev ja máttasámegillii.

ČálliidLágádus lea almmustahttán girjji. Ja dál lea Norgga Kulturráđđi oasttán girjji, ja dat mearkkaša dan ahte girji lea olánmuttus, go dat gávdna de buot girjerádjosiin Norggas.