Reeremen uvtelasse, staatenbudsjeedtesne vuesehte reereme edtja 3,3 millj kr spååredh jis Gaske-Nøørjen saemien skovlem steegkieh.
Dihte eejhtege dåehkie barka jih sæjhta saemien skovlem vaarjelidh jih Marianne Ulriksen Kappfjell bievnede, edtjieh Saemiej åålmege biejjiem Aarboertesen vïhtesjidh.
– Edtjebe Saemiej Åålmege biejjen, Aarboerten tåarjesne tjåanghkenidh, politihkeridie vuesiehtidh man vihkeles Gaske Nøørjen Saemienskovle mijjese. Tjoeveribie naemhtie vihtesjidh, Kappfjelle jeahta.
Vihkeles barkoem dåarjodh
Eejhtegidie, daate bielie jaepieh boelhke fuehpies.
– Tjoeveribie gaajhkes vïehkesjadtedh jih skovlem buektiehtidh vaarjelidh, jis naemhtie saemienskovlem steegkieh, guktie vienhth, magkeres saemien institusjovnem mubpien aejkien steegkieh, Kappfjelle jeahta.
Mannasinie Saemienskovle vihkeles?
– Daate båeries vihkeles skovle mijjese. Daate vihkeles skovle mov maanide, daan saemien gïele- jih kultuvren gaavhtan, jih saemien identitetem nænnoestidh, Kappfjelle jeahta.
Daan biejjien Gaske-Nøørjen Saemien skovle faala, maajh-øøhpetimmiem jih tjåanghkoe våhkoe dejtie sijjien learohkidie. Lehkie dejstie saemien learohkijstie maajh- øøhpetimmiem, Gaske-Nøørjen skovlen tjirrh åadtjoeh.
- Lohkh aaj:
Daelie barre golme øøhpetimmie tjånghkoe vielie gåessie saemienskovlesne tjåanghkenieh jih rektovre Bjørn Erik Davidsen tuhtjie nåake ussjedidh, daate Saemieskovlen minngemes bielie jaepieh boelhke.
– Håjnoes sjidtem jis hojhte skovlem dehpieh, læjhkan håhkoem åtnam, onne nastetje tsïhkijahta, ennje ibie minngemes baakojde jeahteme, edtjebe øøhpetimmie direktoratem mubpien våhkan gaavnedidh, Davidsene jeahta.