NRK Meny
Normal

Eai beassan deaivvadit Stuorradikki bellodatnjunnožiiguin

Gaska-Norgga sámeskuvlla stivra lei bivdán čoahkkimiid buot Stuorradikki politihkalaš bellodagaid parlamentáralaš jođiheddjiiguin, vai besse njuolga sidjiide čilget ášši, muhto sii besse deaivvadit dušše guovtti bellodagaiguin

Jarle Jonassen

Gaska-Norgga Sámeskuvlla stivrajođiheaddji, Jarle Jonassen ii beassan deaivvadit buot stuorradikki bellodatjođiheddjiiguin.

Foto: NSR

Sámeskuvlla stivrra bealis leigga Jarle Jonassen ja Sigbjørn Dunfjell Oslos gos galggaiba deaivvadit Stuorradikki politihkkariiguin. Skuvlla bealis ledje sádden reivviid buot bellodagaide ja bivdán čoahkkima bellodagaid parlamentáralaš jođiheddjiiguin. Sii ožžo vástádusa dušše Olgešbellodagas ja Bargiidbellodagas.

Imaštahtti bellodagat

Mun imaštan daid bellodagaid láhttenvuogi, mat njálmmálaš ovdanbuktimis Stuorradikkis dadje ahte sii dorjo Sámeskuvlla dalle go ášši meannuduvvui Stuorradikkis ovdalaš juovllaid, ja dál eai obage vástit go sámeskuvlla stivra lea singuin bivdán čoahkkima. Nu dadjá Nordlándda Bargiidbellodaga stuorradiggeáirras, Kjell-Idar Juvik.

Kjell Idar Juvik, ordfører i Hemnes

Nordlándda Bargiidbellodaag Stuorradiggeáirras, Kjell-Idar Juvik, lea behotahallon go Stuorradikki politihkarat eai beroštan deaivvadit sámeskuvlla ovddasteddjiiguin.

Foto: Helge Aarrestad / NRK

Son lohká doaivva oažžut Gurutbellodaga ja Risttalaš álbmotbellodaga iežaset beallái, ja nu sihkkarastit doarjaga Sámesdkuvlii, dadjá Juvik.

Šaddet njulget boastu dieđuid

Gaska-Norgga sámeskuvlla heaittiheapmi vuolggahuvvui Solberg-ráđđehusa 2016 stáhtabušeahta evttohusain, mas ráđđehus sihkastii doarjaga Árborde Sámeskuvlii. Dalle dajai Nordlándda ovddádusbellodaga stuorradiggeáirras, Kenneth Svendsen, ahte ruhtajuolludeapmi sámeskuvlii lea dárbbašmeahttun ruhtastajideapmi.

– Mii gal ovdalaččas juo diehtit maid Ovddádusbellodat oaivvilda, muhto sii leat Stuorradikkis juohkán dieđuid ahte skuvllas eai leat oahppit, ja danin lea ruhtajuolludeapmi Gaska-Norgga Sámeskuvlii dušši ruhtastajideapmi. Nu dadjá Kjell-Idar Juvik, ja lohka ahte sii danin dál fertejit njulget dieid dieđuid.

Lågå: Sameskolen skulle nedlegges, men kommunen sørger likevel for å holde liv i tilbudet.

Smávvaruhta

Helgelándda sáddagiid váldoredaktevra, Rune Pedersen, dajai dalle go dát ášši beaggigođii ahte dan golmma miljovnnas mas dás lea sáhka, leat dušše smávvaruđat maid ráđđehus livččii galgan juolludit.

Maŋŋil go ráđđehus ovddidii bušeahttaevttohusasteaset, mas bođii ovdan ahte sii sihkastit doarjaga Sámeskuvlii, de leat oallugat searvan váikkuhusjoavkkuide ja miellačájáhusaide.

Sihke ovddeš ja dálá oahppit, oahpaheaddjit, báikkálaš politihkkarat ja Sámedikki politihkkarat leat searvan, ja geahččalan bargat dan badjelii ahte Gaska-Norgga Sámeskuvla galggai bisuhuvvot.

Dáhkidan ruđaid álgodoibmii

– Nordlándda fylkkamánni lea dáhkidan ruđaid Sámeskuvlla doibmii vai lullisámi oahpahus sáhttá bisuhuvvot. Ja fylkkamánni áigo gozihit ahte oahppofálaldagas lea alla ja buorre kvaliteahta. Nu dadjá Nordlándda Fylkkamánni seniorráđđeaddi, Kevin Johansen.

Nordlándda fylkkamánni lea dáhkidan ruđaid Sámeskuvlla doibmii vai lullisámi oahpahus sáhttá bisuhuv

– Nordlándda fylkkamánni lea dáhkidan ruđaid doibmii vai lullisámi oahpahus sáhttá bisuhuvvot, dadjá Nordlándda Fylkkamánni seniorráđđeaddi, Kevin Johansen.

Foto: Johnny Andersen / NRK

Son lasiha ahte sii leat mielde sihke ruhtadeamen ja eará ládje doarjumis fálaldaga vai dat šaddá bistil ja ahte das lea buorre kvalitehta.

Nordlándda Fylkkamánni bealis leat sii deattuhan ahte sámegielfálaldat galgá leat almmolaš skuvlafálaldat, mii mearkkaša seammaárvosaš lullisámi oahpahus olles lullisámi guovllus, dadjá Nordlándda Fylkkamánni seniorráđđeaddi Kevin Johansen.