Maŋŋil go Ráđđehus jagi 2016 stáhtabušeahtas mearridii heaittihit Gaska-Norgga sámeskuvlla Árbordes, de leat ráđđehusa doarjjabellodagat Gurut ja Risttalaš Álbmotbellodat, Bargiidbellodat ovttas skuvlla váhnemiiguin, ohppiiguin ja oahpaheddjiiguin garrasit dáistalan skuvlla bealis ja bargan dan badjelii ahte sámeskuvla galggai bisuhuvvot.
Dáistaleapmi vuolggahan bohtosiid
Sin dáistaleamit lea vuolggahan buori bohtosiid, danin go ráđđehus lea ikte ovttas ráđđehusa doarjjabellodagaiguin gávnnahan ahte Gaska-Norgga sámeskuvla Árbordes galgá bisuhuvvot stáhta skuvlan.
Máhttoministtar, Torbjørn Røe Isaksen, čállá ráđđehusa neahttasiiddus ahte skuvlla lullisámi gelbbolašvuohta lea dehálaš go galget fállat lullisámi ohppiide buori oahppofálaldaga. Son dadjá ahte maŋŋil ođđa árvvoštallama de leat sii gávnnahan ahte skuvlla gáiddusoahpahus galgá buoriduvvot vai olahit eanet lullisámi ohppiide.
Ovdánahttit fálaldagaid
Røe Isaksen dadjá maiddái ahte go skuvllas eai leat nu ollu dábálaš oahppit, de ferte skuvla joksat ohppiid doppe gos sii leat. Danin áigu stáhta ahte skuvla galgá ovdánahttit fálaldagaideaset ja joksat vel eanet gáiddusohppiid. Ministtar dadjá maiddái ahte eará skuvllat geain leat lullisámi oahppit galggaše ávkkástallat fálaldagaid ja gelbbolašvuođa mii Gaska-Norgga Sámeskuvllas leat
