Gárihuhttinávdnasat noađđin

"Válddes donge", Sámi nuorat ja gárihuhttinmirkkot, dán girjji lea dutki Anna Rita Spein čállán. Sus lea doavttergráda sámi- ja davvinorgga-nuoraid gárrenmirkkuid geavaheamis. Ja beaivválaččat bargá son dutkin Sámi dearvvasvuođadutkanguovddážis.

Vuogas girji nuoraide ja vánhemiidda

Dát fáktagirji lea dehálaš nuoraide ja vánhemiidda, go dás lea sáhka gárihuhttinmirkkuin ja daid vaikkuhusain, maid dát mirkkut dagahit geavaheaddjái ja lagaš birrasii.

Girjjis lea earret eará sáhka das mo geavva jos duhpáha boaldigoahtá, dasage sáhttá olmmoš darvánit, nu ahte ii báljo juo sáhte šat boaldima heaitit. Duhpát ja alkohola leat dieđus lobálaš návddašan-ávdnasat Norggas, muhto máŋgii sáhttá geavvat funet jos daid geavahišgoahtá.

Narkotihkat leat ges gárihuhttimirkkut mat gal dagahit nuoraid eallima ovdii. Dát mirkkut fillejit nuoraid álggos navdit ahte eallin šaddá buorre, somá ja álki jos dáid geavahišgohtet. Duohtavuohta lea ahte geavaheaddji darvána dáid mirkkuide, ja geavahišgoahtá daid eanet ahte eanet. De ii manage guhkes áigi ovdal go geavaheaddji buohcagoahtá, son fáhtehallá psyhkalaš váttuide. De leatge mirkkut rievdadan eallima heajut beallái.

Ii dušše goike fáktagirji

Siri Broch Johansen lea čállán muitalusa juohke gárihuhttinávdnasii. Muitalusain govahallá son mii geavvá nuorain jos geavahišgoahtá duhpáha, alkohola ja narkotihka. Ja fikšuvdnamuitalus lea maid dasa go vánhen fuomáša mo su nuorra lea rievdan. Fuomáša ahte nuorra geavaha gárihuhttinmirkkuid.

Girjjis čálli buohtastahttá sámi- ja dážanuoraid gárihuhttinmirkkuid geavaheami, ja ČálliidLágádus dat lea almmustahttán girjji. Lágádus árvala ahte dán sáhttá geavahit oahppogirjin skuvllain.

Áššis vuolábealde gulat ČálliidLágádusa girjjálašvuođa doaimmaheaddji Ammun Johnskarenga muitaleamen girjjis, ja gulat maid oasážiid fikšuvdna muitalusain.