NRK Meny
Normal

Galggašii gii nu su dávvirvuorkkás váldit vára

Son lea čohkken badjel 2000 dološ dávvira, eatnašat dain leat dávvirat maid mearrasámit leat geavahan. Dál hálidivčče Helmer Losoa vuovdit iežas mearrasámi musea oktain dávviiriin, ja Unjárgga gieldda son hálidivčče oasttit, vai dávvirat bisošedje Unjárggas.

25 jagi lea Helmer Losoa čohkken dološ dávviid, ja dávviriidda lea son maid huksen viesu. Ieš árvvoštallá čoakkáldagas leat guokte-, golbmaduhát dávvira. Ieš iiba riekta dieđege rivttes logu.

Son hálidivččii vuovdit iežas dávvirvuorkká oktain dávviiriin

Son hálidivččii vuovdit iežas dávvirvuorkká oktain dávviiriin

Foto: Anne Olli

Boarraseamos dávvirat badjel guokte čuohte jagi

Čoakkáldagas leat váikke mat. Robis heaŋgájit olu biergasat, seainnit leat dievva dávviiriin ja beavdditge leat devdon dávviriin. Helmer Losoa čájeha boarraseamos goarronmášiinna leat badjel guokte čuohte jagi. Dát lea leamaš su áhku goarron másšin.

Iežas ahki dagaha ahte sávašii vuovdit dávviriid

Ii Helmer Losoa leat šat nuorra almmái, danne dáhtošii dal gávdnat olbmuid geat oasttášedje su dávvirvuorkká ja dávviriid. Iežas lohká ballat mo dávviriin geavva jos son fáhkkesta jávká. Ii olbmo dieđe, go son han lea áigá juo ollen ealáhat-ahkái.

Gielda ja musea eai vástit osttet go

Golbma jagi leat gollan das rájes go sis leat leamaš ságastallamat. Dalle leat sii maid meroštallan hatti, muhto das rájes ii leat šat gullon miige.

Reivve mas oaidna ahte lea leamaš ságastallan

Reivve mas oaidna ahte lea leamaš ságastallan

Foto: Anne Olli

Reivves oaidná ahte Odd-Arne Dikkanen lei dalle áššemeannudeaddji, muhto son ii šat bargga gielddas. Dál Losoa ohcala vástádusa dasa ahte oasttá go gielda dávviriid vai ii.

Várjjat Sámi Museai eiai čága dávvirat

Várjjat Sámi Musea jođiheaddji Mia Krogh muita ahte sis lea leamaš čoahkkin Losoain, muhto son ii šat dieđe das eanet. Diehtá muitalit ahte Unjárgga gielda dat oamašta visot dávviriid Várjjat Sámi Museas, danne lea gielda mii galggašii mearridit osttet go Losoa Musea ja dávviriid.

Dehálaš mearkut ja registreret dávviriid

Mia Krogh lohká ahte livčče leat dehálaš registret Losoa dávviriid, danne go dávvirat eai leat museaide moge ávkin jos dat eai leat registrerejuvvon. Kulturhistorjjálaččat dat lea dehálaš registreret daid, ja dan galggašii dahkat dan bali go Helmer Losoa ieš sáhttá muitalit maid son diehtá dávviriid birra. Ferte diehttit geat dáid leat oamastan, mo dát leat geavahuvvon, ja masa leat geavahuvvon. Son navdá Losoa čoakkáladagas livččejit olu mearrasámi dávvirat maid galggašii registreret. Muhto Krogh deattuha ahte Várjjat Sámi Museas eai leat ruđat dahkat dán barggu.

Gielddas eai leat dán áššis olus hállan

Unjárgga gieldda várresátnejođiheaddji Oddvar Betten ii loga áššiš diehtit áktánasat. Gal son lea gulastan gal das, muhto ii su dieđu mielde gal galgga das poletihkkalaččat ságastallan. Iežas lohká dál áigut lohket ášši ovdagoddái, ja Losoa galgá oažžut makkárnu vástádusa gielddas. Eanet ii loga vuos dása sáhttit dadjat. Lohká gal iežaset fertet fitnat geahčadeamen Losoa dávviriid ovdalgo váldet ášši poletihkkalaš gieđahallamii.