Galgá addit rávvagiid Gahr Størei

Bargiidbellodaga ođđa jođiheaddji, Jonas Gahr Støre, lea válljen sápmelaš hoavdadoaktára Barbro Lill Hætta Háštas mielde bellodatjovkui hábmet boahtteáigge dearvvasvuođapolitihka Norggas.

– Munnje dát lea diehttelasat hui stuorra hástalus ja das lea maid hui stuorra árvu go beasan leat mielde joavkkus mii galgá geahččat boahtteáiggi dearvvasvuohtapolitihka ja hábmet dan. Dat gal lea issoras somá, lohká Hætta.

Go Jonas Gahr Støhre čuojahii dutnje ja jearai alcces ráđđeaddin, mo lei dát?

– Dat gal lei diehttelasat hirbmat somá. Dát leige dakkár fálaldat man gal in sáhttán hilgut. Dát lea hirbmat stuorra hástalus ja mun ilus bargagoađán dáinna joavkobargguin, deattuha Hætta.

Guokte sápmelačča mielde hábmemin boahtteáigge politihka

Jonas Gahr Støre vállejuvvui mannan vahkus Bargiidbellodaga ođđa jođiheaddjin, maŋŋelgo ovddeš jođiheaddji Jens Stoltenberg guđii doaimma go čakčat lea álgimin bargui NATO-jođiheaddjin.

Støre hálida ovdánahttit boahtteáigge politihka ja nu leat njeallje ovdánahttinprošeavtta álggahuvvon:

Dálkkádat, gelbbolašvuohta, árvoháhkan ja dearvvasvuohta.

Dán njunušdoaimmas leaba guokte sápmelačča dan guđa olbmo joavkkus, Barbro Lill Hætta ja Helga Pedersen.

– Mun ledjen rámis go jurddašin, ahte dás leat guokte nissonolbmo ja guokte sápmelačča dán beavdde birra. Dát mearkkaša, ahte sápmelaččat besset mielde hábmet našonála politihka. Dat lea miellagiddevaš ja dat addá erenoamáš buori vejolašvuođa sápemelaš politihkkáriidda ja dearvvasvuohtabargiide ovddidit oainnuideaset dán politihkalaš gažaldagain mainna mii galgat bargat, čilge Berbro Lill Hætta.

Barbro Lill Hætta lea bajásšaddan Guovdageainnus Finnmárkkus. Son lea doaktárin lohkan Romssa universitehtas.

Jagiin 1996–1997 lei Hætta ráđđehusa sámepolitihakalaš ráđđeaddi gieldda- ja bargodepartemeanttas.

Son lea dál Hášttá gielddadoavttir. Jagis 2003 válljejuvvui son Hášttá gielddastivrii. Jagiin 2005-2007 lei Barbro Lill Hætta Hášttá várresátnejođiheaddji.