Samiske kofter/Gákti Facebook-siidu lea bálkestan miellahtuid. Ođđa gávttit/gákt'er joavku ilmmai guokte vahkku áigi. Gávttit/gákt'er siiddu ásaheaddji lea ieš bálkestuvvon miellahttun dan nuppi siiddus.
Njuolggadusat vuođđun manne olbmot eai dohkkehuvvo siidui
Samiske kofter/Gákti siidu ilmmai guovvamánu 3. beaivvi 2015is, ja odne leat lagábui 5.500 miellahttu. Dát siidu lea okta dain bivnnuheames sámi joavkosiidduin FBs, gos olluhat digaštallet gávtti birra. Dáppe beasat buktit oaiviliid, muhto eai buot oaiviliid gal dohkket lohká siiddu eadni Kirsti Irene Johnsen.
Johnsen muitala ahte leat šaddan sihkastit soames miellahttu, go eai leat čuvvon sin njuolggadusaid. Johnsen ii čilge gal maid sihkastuvvon miellahttot leat čállán, iige loga gal diehtit man oluhiid leat šaddan sihkastit miellahttun. Son lea oaidnán dán ođđa gávttit/gákt'er siiddu, muhto ii leat dieđihan dása miellahttun, lea buorre go eanet dákkár siiddut ilbmet.
Ođđa gáktesiidu ilmmai FBii
Guokte vahkku áigi ilmmai ođđa gáktesiidu FBii, namalassii Gávttit/gákt'er masa dán
jándoris leat badjelaš 500 ođđa miellahttot searván. Oktiibuot leat siiddus 1059 miellahttu. Siiddu eadni, Guovdageaidnulaš Margrethe Nilsdatter Buljo muitala ahte ii goassege jáhkkán ahte ná stuora beroštumi oažžu sin FB joavkosiidu.
Buljo lei ieš miellahttun samiske kofter/gákti siiddus, muhto sihkastuvvui fáhkka miellahttun. Son deattuha ahte dát ii leat sivvan manne son ásahii dán ođđa gáktesiiddu, muhto háliidii čájehit makkár biktasat gullet oktii, vuoi eai seagut.
–Oidnen Instagrama govas, dat lei Vuotnabađa gákti, Guovdageainnu bártnaža vuoddagat ja lei láigeboagán, ja Guovdageainnu gahpir dan nieiddažis, danne háliidin ásahit dán ođđa siiddu lohká Buljo.
Goappatlágan njuolggadusat
Samiske kofter/Gákti joavkosiiddus leat čielgá njuolggadusat maid miellahtut fertejit čuovvut, ja sii fertejit sihkastit sin geat eai čuovo dáid lohká Kirsti Irene Johnsen. Dieđusge sáhttet digaštallat gávttiid ja čiŋaid birra, muhto ii fal garrasit cuiggodit earáid. Johnsen lohká ahte šaddan hilgon muhtin miellahtuid, muhto ii sáhte čilget man vuođul sii leat bargan dán.
Gávttit/Gákt'er joavkosiiddus ferte dieđusge maid čuovvut bidjon njuolggadusaid, nugo atnit olmmošvieru, eaige njulgestaga láitit dujiid mat ilbmet lohká hálddašeaddji, Margrethe N. Buljo. Lea maid dehálaš deattuhit ahte leat áššálaš ságastallan, ja eai áiggo goit sihkastit ovttage miellahttu, loahpaha Buljo.