Ođđaáigásaš kultursála Gáivutnii

Gáivuona ovdagoddi áigu veahkehit Davviálbmogiid guovddáža ođásmahttit dálá boaresáigásaš kultursála. Dál lea suohkanstivrra duohket dohkehit juolludeami.

Kulturdepartementa goazidan prošeavtta

Oktiibuot máksá kultursála ođásteapmi 11,2 milliovnna ruvnno. Davviálbmogiid guovddáš lea ožžon doarjaga ođásmahttinbargui Sámedikkis, Romssa fylkasuohkanis ja Musikkutstyrordningen. Guovddáš lei ohcán 3,7 milliovnna ruvnno Kulturdepartementtas, muhto sii eai leat vuoruhan dán bušeahtas dán jagi iige boahtte jagi.

Kulturdepartementa sáhttá áramusat juolludit doarjaga 2017s. Davviálbmogiid guovddáš ja Gáivuona suohkan leat čoahkkinasttán Kulturdepartementtin, muhto eai leat ožžon lohpiduvvot ruhtadoarjaga prošektii.

Ođásmahttin mearkaša olu sihke davviromsii ja sámi kulturovdaneapmái

Davviálbmogiid guovddáža jođiheaddji, Astrid Solhaug lea erenoamaš ilus go Gáivuona ovdagoddi lohpida doarjut prošeavtta go sis lea duođái dárbu ođásmahttit kultursála. Dát buorida musihkkakonserttaid, teahterčájálmasaid. Dasa lassin šaddá kultursála ođđaáigásaš ja čuvvot olu rustegat vel fárus, nu ahte nugo Beaivváš Sámi teahter ii dárbbaš fievrát nu olu rustegiid fárus go dán radjái leat šaddan, dadjá Solhaug.

Maiddái Gáivuona suohkan ja oba davviromsa boahtá oažžut ávkki dán ođđa kultursálas mii ođásmahtto Olmmávákkis, dadjá Gáivuona sátnejođiheaddji Svein Leiros. Leiros jáhkká ahte Gáivuona suohkanstivra čuovvola ruhtajuolludeami dán mánu gaskkamuttus go meannudit ášši.

Ruhtaseahka nogái haddegoarŋuma geažil

Davviálbmogiid guovddáža viiddidanbarggut alggahuvvoje juo arrat jagi 2000s. Viiddideapmi lei rehkenastton máksit 22 milliovnna ruvnno, ja jagi 2010s lei vistti gárvvis. Prošeakta šattái divraset go lei rehkenastton, ja de ferteje maŋidit kultursála ođásteami mii dál orru olámuttus.

Gula Davviálbmogiid guovddáža jođiheaddji, Astrid Solhaug: