Gáibidit ráđđehusa doamahallat

– Ráđđehus fertešii doamahallat vuoi oažžu sadjái registtera mii čájeha man ollu loanat olbmuin leat. Dan gáibidit Stuoradikki unnilogubellodagaid politihkkarat, čállá Dagens Næringsliv. Dál eai beasa báŋkkut mat galget árvvoštallat olbmuid viessoloatnaohcamušaid, ahte leago sis juo kredihtta- ja eará loanat. – Dakkár registtar dagašii álkkibun biehttalit addimis loanaid olbmuide geat eai nagot máksit dáid, lohka sosialisttalaš gurutbellodaga finánsapolitihkkalaš ovddasteaddji, Snorre Valen aviisii. Ráđđehusa bealis lohket ahte sii leat bargame dáinna.