NRK Meny
Normal

Gáibidit guorahallat Utøya-miljovnnaid

Searvi mii doarju sin guhte besse heakkas Utøya-goddimiin gáibidit eiseválddiid guorahallat mot Utøya-ruđat leat geavahuvvon.

Utøya, Lisbeth Røyneland Mani Hussaini AUF

Lisbeth Røyneland jođiha searvvi mii veahkeha sin guhte leat gártan gilládit Utøya fallehemiid geažil. Dá son lea ovttas Mani Hussain:ain.

Foto: Nesvold, Jon Olav / NTB scanpix

Seammás árvvoštallá maid Riikkarevišuvdna gávnnahit mot stáhta lea stivrren juolluduvvon ruđaid. Dan čállá aviisa VG .

Stuorradiggi lea 2011 rájes juolludan oktiibuot 180 miljovnna kruvnnu veahkehan dihtii sin guhte leat gártan gilládit fallehemiid geažil mat dáhpáhuvve suoidnemánu 22. beaivve 2011:s Utøyas ja ráđđehuskvartálas.

Olusat váldet oktavuođa

Doarjjajoavku lea maŋimuš jagiid ožžon ollu oktavuođa gillájeaddjin geat eai leat ožžon dan veahki maid dárbbašit gielddas.

– Mii leat dávjá dan cuiggodan eiseválddiide, ja cealkán dieđuid ahte ruđat ollu sajiin eai leat boahtán ávkin gillájeddjiide, muitala searvvi jođiheaddji Lisbeth Røyneland VG:ii.

Doarjjajoavku oaivvilda ahte Dearvvašvuođa – ja fuolahusdepartemeanta jođánamosat berre kártešgoahtit doarjjaortnega. Maiddái geavaheaddjit berrejit beassat oassálastit dan barggus, doarjjasearvi deattuha.

Guokte miljovnna kruvnnu jávkan

Kárášjoga bearráigeahččanlávdegoddi gal juo lea guorahallan mot gielda doppe lea geavahan ruđaid maid leat ožžon stáhtas, oktiibuot 2,55 miljovnna kruvnnu. Dušše oasáš ruđas, 417.000 kruvnnu, lea boahtán ávkin gillájeddjiide, iskkadeapmi čájeha .

Elfrid Boine

Kárášjoga ráđđealmmái, Elfrid Boine, lea dovddastan gieldda geavahan boastut Utøya-ruđaid, ja lea bivdán ándgassii gillájeaddjiin.

Foto: Monica Falao Pettersen / NRK

Álggos ráđđealmmái biehttalii bearráigeahččanlávdegotti raportta . Muhto gaskavahku son ánui ándagassii , ja dovddastii guorahallanraportta čájehit duohtavuođa.

Gielddastivrra lea mearridan geavahit foandaruđaid , oktiibuot guokte miljovnna kruvnnu, veahkehan dihtii gillájeddjiid.

Stáhtaráđđi ferte čilggadit ášši

Maiddái Stuorradikki Bearráigeahččan- ja konstitušunlávdegoddi lea árvvoštallan Kárášjoga gieldda ruhtageavaheami.

Lávdegoddi lea golggotmánu 1. beaivve čálalaččat bivdán dearvvašvuođaministtara Bent Høie kommenteret Kárášjoga ášši ja válddahallat ahte lea go departemeanta ožžon dieđuid ahte maiddái eará gielddat eai leat geavahan ruđaid eavttuid ektui.