Gáibidit bissehit Nussir doaimma

Sámediggeráđđi gáibida ráđđehusa julggaštusa vuođul bissehit Nussir ASA ruvkeálggaheami.

Riehpevuotne

Sámediggeráđđi vuordá ahte Nussir ruvkedoaibma ii álgge go ráđđehus ii šat luoitte ruvkebázahusaid luoitit vutnii.

Foto: Eilif Aslaksen / NRK

Sámediggeráđđi, Silje Karine Muotka, oaivvilda ráđđehusjulggaštusain sáhttit bissehit Nussir ASA ruvkeálggaheami. Stáhtačálli muittuha Nussir ASA lea jo ožžon lobi ruvkebázahusaid luoitit vutnii, muhto ođđa ohccit eai oaččo šat dakkár lobi.

Sámediggeráđđi gal lihká oaivvilda vejolaš bissehit ráđđehusa dieinna ođđa julggaštusain.

Silje Karine Muotka

Sámediggeráđđi Silje Karine Muotka dulko ráđđehusjulggastusa nu ahte ruvkebazahusaid eai beasa luoiti Riehpovutni.

Foto: Andre Bendixen / NRK

– Ja nu mo mun tulkon dan julggaštusa, de dat mielddisbuktá ahte ii sáhte addit dan dohkkehusa dan Nussira prošektii ge, lohká Sámediggeráđđi Silje Karine Muotka.

Ođđa prošeavttaid bissehit

Dálkkádat- ja birasdepartemeanttas gal čilgejit Jeløya julggaštusa eará go dat mo Sámediggeráđđi dál orru dulkomin dan, muhto stáhtačálli Atle Hamar ii loga julggaštusa guoskat Nussirii mii lea áigá jo ožžon lobi vutnii luoitit ruvkebázahusaid.

Atle Hamar, Lotteritilsynet

Dálkkádat- ja birasdepartemeanta stáhtačálli Atle Hamar ii loga ráđđehusa dálá ruvkebázahusaid luoitingildosa guoskkat Nussir doibmi.

Foto: Lotteritilsynet

– Mon ádden sámediggeráđi beroštumi áššái, muhto ráđđehusa julggaštus bisseha dušše ođđa deponiijaid ásaheamis ii ge doaimmaid mat leat jo, čilge stáhtačálli Atle Hamar (Gurutbellodat).

Čuohcá ruvkeealáhussii

Nussir ASA lea moadde jagi dassái jo ožžon luoitinlobi ruvkebázahusaide ruvkedoaimmas Fálesnuoris, Finnmárkkus.

Øystein Rushfeldt

Nussira hálddahusdirektevra Øystein Rushfeldt muittuha iežaset ožžon bážahusaid luoitinlobi Riehpovutnii, jo moadde jagi dassái, ja julggaštus ii váikkut dalle sin doibmii.

Foto: Kai-Erik Bull / NRK

– Dat čuohcá ealáhusa fitnodagaide main livčče áigumuš ohcat dahje mat leat ohcamin luoitilobi merrii, muhto diet mearrádus ii váikkut dál gal moktiige Nussir plánaide, lohká Nussira hálddahusdirektevra Øystein Rushfeldt.

Morašta luonddu váikkuhusain

Sámediggeráđđi aŋkke morašta luonddu váikkuhusaid dán oktavuođas

– Dat lea dan dihtii go dát prošeakta lea hui duođalaš sihke biras ektui ja eamiálbmogiid beroštumiide dan guovllus, loahpaha Silje Karine Muotka.

Geahča presideantaduella: Eaba leat ovttaoaivilis ruvkeáššis