Dát gávccis dat galget digáštallat:
Aili Keskitalo (48) orru Guovdageainnus ja lea Norgga Sápmelaččaid Riikasearvvi presideantaevttohas Ávjováris. Son lea guktii ovdal leamaš presideantan. Keskitalo lea náitalan ja hállá sámegiela.
Vibeke Larsen (45) lea ođđa bellodaga Šiella presideantaevttohas ja dálá presideanta. Son lea náitalan ja sus leat njeallje máná. larsen hállá dárogiela, muhto oahpahallá sámegiela.
Ronny Wilhelmsen (47) orru Álttáš ja lea bargiidbellodaga presideantaevttohas Davveguovllus. Son lea náitalan ja hállá dárogiela, muhto lohppida doallat ođđajagisártni sámegillii jus šaddá presideantan. Lea lohkagoahtán sámegiela.
Inger Eline Eriksen Fjellgren (29) orru Kárášjogas jea lea Árjja presideantaevttohas Ávjováris. Son lea ovddastan Árjja álggu rájes. Fjellgren lea náitalan ja hállá sámegiela, ja son lea maid dálá sámediggeráđis.
Toril Bakken Kåven (49) orru Álttás ja lea Nordkalottfolket presideantaevttohas. Su beaivválaš giella lea dárogiella, ja son lea náitalkeahtes.
Cecilie Hansen (47) orru Báhcaveajis ja lea Guovddášbellodaga listanjunoš Nuortaguovllus. Son lea náitalkeahtes ja hállá dárogiela. Son cokkai gávtti vuosttaš geardde go lei Mátta-Várjjaga sátnejođiheaddji ovddit gielddaválgaáigodagas.
Nils Kristian Winther (21) orru Tromssas ja lea Olgeža vuosttaševttohas Nuortaguovllus. Son hállá dárogiela, muhto ádde sámegiela.Vaikke lea nuorra olmmoš, de lea guhká leamaš politihkas.
Arthur Tørfoss (61) ássá Romssas ja lea Ovddádusbellodaga listanjunuš Davveguovllus. Sus lea ovttasássi ja hállá dárogiela. Son ovddasta áidna bellodaga mii háliidivččii heaittihit Sámedikki.
Galget muitalit sámevuođa boahtteáiggi
Digáštallama jođiheaba Anne Marie Hætta ja Sárá Máret Rávdna Oskal.
– Munno mihttomearri lea ipmirdahtti vuogi mielde jođihit válgadigáštallama dahje nu mo eaŋgalasgillii daddjo, «Keep it simple», čilge Anne Marie Hætta.
– Maid áigo buohkain gáibidit čielga vástádusaid, deattuha Oskal.
NRK Sápmi ja Ávvir barget dán jagi ovttas sámediggeválggain, ja ihttin rahppo válgagižžu almmolaččat Romssa kulturviesus.
Digáštallan álgá diibmu 18 ja bistá diimmu. Olles digáštallan sáddejuvvo njuolggosáddagis NRK Sámi ja Ávvira neahttasiidduin.
Neahttasátta álgá jo diibmu 17.30. Dalle Thor Thrane ovttas bovdejuvvon gussiiguin «ligge» gehččiid Romssa kulturviesu unnalávddis ja daid geat čuvvot sáddaga neahta bokte.
Thrane joatká neahttasáddagiin gitta 19.30 rádjái. Ovttas bovdejuvvon gussiiguin son árvvoštallá mo dat gávcci digáštalli birgejedje.