Yle Sámi Radio dieđuid mielde lea IIPFCC sádden rabas reivve Ruošša presidentii Vladimir Putinii, Ruošša sisáššiidministeriijai ja boleshoadii Vladimir Kolokoltsevii eamiálbmotáŋgirdeaddji Rodion Sulyandziga doarjuma dihte.
IIPFCC vuostálastá garrasit heađušteami, maid eamiálbmotvuoigatvuođaid bealušteaddji Rodion Sulyandziga lea vásihan.
- Loga maiddái:
Golbma gáibádusa
IIPFCC gáibida vuogatvuođaid ja iešmearridanrievtti eamiálbmogiid ovddasteddjiide, geaid sii ieža leat válljen.
– Máilmmi stáhtat galget dovddastit, gudnejahttit ja suddjet eamiálbmotovddasteddjiid vuoigatvuođa oassálastit áššiide, mat váikkuhit sin vuoigatvuođaide. Dát vuoigatvuođat dovddastuvvojit riikkaidgaskasaš soahpamušain ja julggaštusain, nugo Ovttastuvvan Našuvnnaid eamiálbmovuoigatvuođaid julggaštusaid, Pariisa soahpamuš, ILO 169 ja earát, čállá IIPFCC.
Sihkkarastit vuoigatvuođaid
IIPFCC bivdá erenoamážit Ruošša eiseválddiid heaitit heađušteamis ja balddáhallamis eamiálbmotjođiheddjiid Ruošša federašuvnnas. Buot eiseválddit galget sihkkarastit dáid jođiheddjiid vuoigatvuođaid bargat álbmogiiddiset ovddas, vai sii sáhttet oassálastit servviideaset ja stáhtaideaset ovddideapmái.
IIPFCC ávžžuha árvvoštallat dáid vuođđogáibádusaid, vai sin kollegat ja verddet leat dorvvus Ruošša federašuvnnas.