NRK Meny
Normal

Fuolašii áinnas gávtti

Oslo sátnejođiheaddji Fabian Stang cokkašii áinnas gávtti badjelii.

Fabian Stang

Oslo sátnejođiheaddji Fabian Stang fuolašii áinnas gávtti.

Foto: Kallestad, Gorm / SCANPIX

Ellen Kristina Saba

Olgešbellodaga sámediggepolitihkkár, Deanu gielddastivrraáirras ja gáktegoarru Ellen Kristina Saba.

Foto: Lisa Marie Anti / NRK

Dál ii leat oaivegávpoga njunnošis gákti nu mo Tromssa sátnejođiheaddjis. Ja gáktegoarru lea gearggus.

Olgešbellodaga sámediggepolitihkkár ja Deanu gielddastivrraáirras Ellen Kristina Saba logašii iežas áinnas goarrut gávtti Fabian Stangii.

Oaivegávpogis orrot ollu sápmelaččat

Su mielas lea seammá lunddolaš oaivegávpoga sátnejođiheaddjái čiŋahit gávttiin go Tromssa sátnejođiheaddjái. Oaivegávpogis, Oslos han orrot issoras ollu sápmelaččat, dadjá Saba.

Fuolašii áinnas gávtti

NRK deaivá Oslo sátnejođiheaddji Fabian Stanga ráđđeviesus, ja áinnas válddášii son vuostá gávtti.

Ja Sámi álbmotbeaivvi, guovvamánu 6. beaivvi bovdege sátnejođiheaddji Oslo sápmelaččaid herskostallat. Dien beaivái liikošii Fabian Stang coggat ođđa gávtti. Ja dál go son lea gehppon vel, de ii manašii nu ollu láđđi dahje eará stoffa, dadjá Stang.

Ii eahpit makkár gávtti son skeŋkešii

Ja miehtá Sámi gávdnojit iešguđetlágan ivdnás gávttit. Gáktegoarru Deanus, Ellen Kristina Saba gal ii eahpit makkár gávtti son skeŋkešii.

– Das gal berrešii leat Deanu gákti, fiinna geahppa gákti, lohká Saba.

Muhto guđelágan gávtti háliidivčče sátnejođiheaddji ieš?

Stanga mielas šaddá beare váttis válljet guđelágan gávtti son fuolašii, muhto beare dat lea norggabeale gákti de son jáhkká šaddat hámalaš.

- Galggašii álggahit gilvvi

Sámediggepolitihkkár Ellen Kristina Saba árvala ahte livččii buorre jurdda ávžžuhit eandalii nuoraid álggahit juogalágan gáktegoarrun gilvvu daid iešguđetge sámi guovlluid gaskka, gos galget goarrut fiinna gávtti Stanga sturrodaga mielde, ja de beasašii Stang ieš de válljet guđemuš gávtti son fuolašii.

Guldal ášši: