Friddjagávppašanšiehtadus USAain
Kanada stádaministtar ja Meksiko presideanta leaba dál lagabut gulahallagoahtán mo láhttet go USA ođđa presideanta háliida nuppástuhttit friddjagávppašanšiehtadusa mii dien golmma riikka gaska lea leamaš. Kanada stádaministtar Justin Trudeau cuige dasa ahte Davvi-Amerihkká lea okta dain guovlluin oppa máilmmis mii lea buoremus lihkostuvvan ekonomalaččat. USA presideantta Donald Trump mearrádus huksegoahtit rádjemuvrra Meksiko vuostá lea billistan USA ja Meksiko gulahallama oalle sakka. Ja go Trump mannan vahkus vel geardduhii ahte Meksiko galgá máksit dien muvrra huksema, de Meksiko presideanta Enrique Pena Nieto ii vuolgán iežas plánejuvvon mátkái USAi.