Suoidnemánus ii leat nu dábálaš ahte artisttat almmuhit šuoŋaid, go sii leat johtimen festiválaid gaskkas.
Lihkká leat sámi artisttat, nu go SMAILI, Agnete Saba ja Cazoo, almmuhan šuoŋaid mat ledje garra gilvvus dán háve.
Maŋážassii nammaduvvui SMAILI suoidnemánu Urbin, Rihanna coveršuoŋain «Rude Boy», gaccaid bániid ovddabeale Agnete ja Cazoo.
SMAILI lea Kárášjohkalaš Aili Kathrine Wergeland Teigmo DJ namma, ja son lea álgán geavahit dan go almmuha coveršuoŋaid.
Márkomeannos muitalii NRK Sápmái ahte son liiku ráhkadit coveršuoŋaid, ja ahte dat lea šaddan oassin sus.
– Dat lea nu mun álgen, son muitala.
Viidásat muitala ahte dat addá sutnje veahá dáiddalaš friddjavuođa. Dat siskkáldas kritihkka jávká.
– Don it dárbbaš smiehtat ahte galggat čállit perfeakta lávlaga, go dat lea jo perfeakta, son lohká.
Guldal ođđaseamos sámi musihkka New Music Sápmi listtus Spotifyas.
Lávvordaga lágiduvvo ČSV ávvudeapmi Sirbmá gilivisttis. 50 jagi áigge lei girjeseminára Sirbmás, ja das buollái ČSV-doaba. Dan muitala Katri Somby, gii lea oassi lágidanjoavkkus.
– Mii leat olu ollašuhttán 50 jagis. Dál mii áigut dan ávvudit. Dasa lassin háliidit čalmmustahtit vuoras olbmuid, min ovdavázziid, muitala son.
Arctic Minerals AB lea gávdnán muhtun sajiin máŋga duhát grámma kobolt juohke tonna nammi. Fitnodaga stivrra nubbijođiheaddji Krister Söderholm ii gohčot dán nu valljin, muhto goitge buori boađusin.
Minerála lea dárbbašlažžan earret eará go elbiila litium-báhtterii buhtaduvvo. Fitnodat lea čađahan ohcamiid suoidnemánus ja sii jotket ohcamiid borgemánus maid.
