Fred Buljo oassálasstá MGPan 2019

Duolva Duottar artissta la akta oassálasstijs Vuonarijkalasj Melodi Grand Prixan (MGP).

KEiiNO

KEiiNO: Tom Hugo, Alexandra Rotan ja Fred Buljo.

Foto: Pressebilde / NRK

Duolva Duottar artissta Fred Buljo galggá oassálasstet Vuonarijkalasj Melodi Grand Prixan aktajn joavkujn KEiiNO dán gidá.

KEiiNO la joavko namma gånnå sábme ja Duolva Duottar-artissta Fred Buljo la oassen. Joavkko l aktijsasjprosjækta Fred Buljojn, Alexandra Rotanijn ja Tom Hugojn.

Tebma l histåvrålasj ráhtjamusá

«Spirit in the Sky» la lávlo namma majna joavko galggá gilfádit.

Histåvrålasj rahtjamusá avtaárvvusasjvuoda diehti berustahtek tjærdalasjvuoda, sjierve ja seksualalasj mielastuvvamij lij da ássje ma lij vuodo lávlluj. Sáme álmmuk la guhkijt ráhtjam dåhkkiduvvat ietjas kultuvra diehti.

Luondulasj sámijn

Tom Hugo aktan ietjas gálasjguojmijn Alex Olssonijn tjállegådijga lávlov, ja sunnuj sjattaj luondulasj segadit sáme lávllotjállev prosjæktaj.

Fred Buljo mielastuváj dasi ja navti de sjattaj lávllo “Spirit in the Sky”. Dan maŋŋela sjattaj aj suoma buvtadiddje Henrik Tala ja Alexandra Rotan aj oasse dán joavkon.

Fred Buljo (30) Guovddagæjnos sjattaj dåbdos gå sån lij oassálasste «Norske Talenter» finálan ietjas joavkujn Duolva Duottar jagen 2008.

Buljo la dan rájes manádam Nuorttarijkajt ja Ruossjarijkav, lávllotjállen barggam ja aneduvvá uddni degu Sáme buoremus liveartisstan.

Gilfádallam

Melodi Grand Prix la Vuonarijkalasj musihkkagilpustallam mav NRK jådet. Gilpustallam la nuppát biejve snjuktjamánon, Oslo Spektrumin, Oslon.

Sån gut danna vuojttá oadtju åvdåstit Vuonarijkav rijkagasskasasj gilpustallamin Eurovision Song Contest Israelan.