Prográmmajođiheaddji Sara Ellen Anne Eira fállá olu gelddolaš kulturáššiid dán čavčča vuosttaš Árdna-sáddagis, duorastaga golggotmánu 5.beaivve diibmu 17.25.
10 000 geahčči unnit njealji jagis.
Maŋemus njeallje jagi lea sámi našunála teáhter vásihan ahte gehččiidlohku lea garrasit njiedjan. Jagis 2002 fitne badjel 14000 olbmo geahččame Beaivváža čájáhusaid. Diibmá fas eai lean go 4600 geat oidne sámi teáhtera bihtáid.
– Beaivváš lea gáidan eret sámi álbmogis, oaivvilda kulturjournalista Ammun Johnskareng. Teáhterhoavda lohká fas iežaset dihtomielalaččat válljen intiibma teáhtera. Ártnas mii geahčastit lagabui Beaivváš sámi teáhtera mii vásiha ahte olbmot leat jorgalan sealggi sidjiide.
Interneahtta, ođđa arena sámi artisttaide.
Interneahtta lea šaddan ávkkálažžan nuorra sámi artisttaide. Dán prográmmas oaidnit makkár ávki máilmmiviidosaš fálaldagas lea nuorra artistta guoktái, geat almmuheaba iežaska musihka ja luđiid, ja nu lea olles máilmmi álbmogis vejolašvuohta guldalit sudno musihka. – Interneahta haga ii livččii munnje soma ráhkadit musihka, lohká Rolf Morten Anti Amundsen (19) dahje rOlfFa nugo su artistta namma lea. Árdna sáddagis oainnát don movt rOlfFa og Berit Margrethe Oskal (29) atniba interneahta fállat iežaska šuoŋaid ja árbevirolaš luđiid máilbmái.
Folkelarm vuoiti Ártna studios
Ruoŧabeal sápmelaš Lars Ánte Kuhmunen lea vuosttaš sámi artista, gii lea vuoitán Folkelarm álbmotmusihkka bálkkašumi. Su vuosttaš skearruin ”Birrasis” oaččui son bálkkašumi ođasmahtti ja hutkáivuođa luohkás. Folkelarm bálkkašupmi lea sidjiide geat buriid vugiin dovddusindahket norgga álbmotmusihka, ja Árdna-prográmmas oaidnit makkár jurdagat nuorra artisttas leat boahtteáiggi birra.
”Árdna - Sámi kulturmagasiidna” sáddejuvvo NRK1:žis duorastaga golggotmánu 5. beaivvi dii. 17.25.
Prográmma oainnat maid dappe: