Norway Seafood fitnodat oažžu lobi luoitit reabbábázahusaid merrii gitta 2016 juovlamánu maŋimus beaivvi rádjai. Dan lea Fïnnmarkku Fylkkamánni dohkkehan, ja cealká ahte báikki gosa bázahusaid áigot luoitit galget hápmaneiseválddit dohkkehit.
Eai leat eará báikkit
Norway Seafood fitnodat vuostáiváldá ja reide gonagasreappáid, ja leat ohcamušas, man Fylkkamánnái leat sádden, čállán ahte báikkis eai gávdno eará báikkit gosa reabbábázahusaid galget čohkket. Danin sii leat ohcan lobi daid merrii luoitit.
Fylkkamánni čállá ahte Gilivuonas eai leat vuostáiváldinbáikkit gosa sáhtášii doalvut reabbábázahusaid, ja ahte son vuordá ahte Norway Seafood fitnodat árjjalaččat searvá bargui oččodeames vuostáiváldinbáikki Gilivutnii.
Buot Fylkkain Norggas lea oalát gildojuvvon dákkár bázahusaid luoitit merrii, muhto fitnodagat sáhttet ohcat Fylkkamánnis lobi daid luoitit merrii jus eará vejolašvuođat eai gávdno. Fitnodat árvvoštallá ge ahte sii dárbbašit lobi luoitit sullii 100 tonna reabbábázahusaid.
Ii váikkut birrasa
Fylkkamánni árvvoštallama mielde de fitnodaga reabbábázahusaid luoitin merrii ii dagat namuhanveara váikkuhusaid, ja čállá ahte sii leat árvvoštallan fitnodaga ohcamuša nuoskkidanláhkaásahusa, luonddušláddjivuođalága ja čáhceláhkaásahusa mielde, ja čállá ahte luoitin ii dagat namuhanveara ja dohkketmeahttun váikkuhusaid lundui.
