NRK Meny
Normal

Unnit suodni diimmá ektui

Vaikke geassi lea leamaš galbmaseamos geassi máŋggaid jáhkkái, de orru suoidnešaddadeapmi buorre Finnmárkkus, oaivvilda ráđđeaddi Jan Svendsen.

Ulf Ballo

DUHTAVAŠ: Boanda Ulf Ballo lea duhtavaš vaikke lea leamaš galbma geassi.

Foto: Bård Wormdal / NRK

Jan Svendsen lea ráđđeaddi Norgga eanandoalloráđđeaddi doaimmas Finnmárkkus, son duođašta ilolaččat ahte Finnmárku lea runodan vaikko leage leamaš galbma geassi:

– Orru buorre suoidnešaddu dán jagi, go suoidni oažžu galbmá álggu de bidjá eambbo oalggaid, ja suoinnit šaddet dalle hui lahkalagaid, dadjá Svendsen.

Svendsen lea leamašan máŋgga báikkis Deanus iskamin suinniid, ja dadjá ahte orru hui buorre. Álttás lea suoidnešaddu álgán árrat, ja doppe maid orru buorre

Suoinnis buorre kvalitehta

Ulf Ballo lea boanda Deanus, ja son lea dássážii duhtavaš suoidnešattuin.

Orru leamen ahte lea unnit suoidni dán jagi go diibmá, muhto kvalitehta suoinnis lea buorre.

Ulf Ballo

Son oaivvilda ahte lea dábálaš jahki, vaikke dálki ii leat leamaš buoremus. Boanda dadjá ahte galbma geassi ii dárbbaš mearkkašit ahte šaddá heajus šibitbiebmoáigodaga.

Suoinnit njozet šaddan

Boanda Sirpmás, Arvid Varsi muitala ahte galbma geassi lea dagahan ahte suoidni lea njozet šaddan:

Arvid Varsi boanda

Boanda Arvid Varsi doaivu ahte čakča šaddá buorre, go geassi ii leat leamaš buoremus.

Foto: Priváhta

– Loahpas dat gal šattai suoidni, muhto dat šattai hui njozet. Ja sullii beannot vahkku maŋŋá go maid láve, dáppe min guovllus goit. Álgogease lei hui buorre. Muhto, de geavai nu ahte šattai čoaskásat ja čoaskásat, dat bisánii dat šaddu, čilge Varsi.

Diimmá ektui ii leat suoidnešaddu nu buorre:

– Mii lávet sullii vuosttaš váhku geassemánus láddjet, ja dán jagi ii lean gal šaddan seamma bures go diibmá, dalle šadden vuordit goit vahkku guhkkit ovdal go bessen álgit láddjet, dadjá boanda Varsi.

Eai rámo suoidnešattus

– Čáhcesullo guovllus ii leat nu buorre dillii. Eai dat oru gal nu rámpomin dieppe mearabeale, muitala Arvid Varsi.

– Mun lean háleštan boanddain Báhčaveajis, doppe ii leat nu buorre go Deanus. Jus dál oažžut veahá lieggasa de dáhpáhuvvet diŋggat johtilit, oaivvilda ráđđeaddi Jan Svendsen.