Finnmárkku ja Romssa moivi čuohcá maid Sámediggái

Moivi, mii lea čuožžilan Finnmárkku ja Romssa ovttastahttima hárrái, čuohcá maiddái ovttasbargui mii Finnmárkkus lea leamaš Sámedikkiin.

Aili Keskitalo og Ragnhild Vassvik

VUOLLÁIČÁLIIGA ŠIEHTADUSA: Lei buorre mokta go Aili Keskistalo ja Ragnhild Vassvik deaivvadeigga ikte. Muhto ovttasbargošiehtadus maid vuolláičáliiga bistá dušše beannot jagi.

Foto: Nils Henrik Måsø / NRK

Finnmárkku fylkkasátnejođiheaddji Ragnhild Vassvik (Bb) ja sámediggepresideanta Aili Keskitalo (NSR) deaivvadeigga ovttasbargočoahkkimis Njávdámis Nuorta-Finnmárkkus ikte. Muhto soai eaba sáhte plánet ovttasbarggu guhkkelii go 2019 loahpageahčai.

– Lea váttis dadjat geainna das maŋŋá galggašeimmet ovttasbargat go eat dieđe mii geavvá suohkaniid ovttastahttinbargguin maid ráđđehus lea álggahan, dovddaha Keskitalo.

Vassvik oaivvilda ahte gielddaministtar Monica Mæland dat ferte váldit ovddasvástádusa dan moivái ja eahpesihkkarvuhtii mii lea čuožžilan.

Ii dohkket bággonáittosdili

Kommunal- og moderniseringsminister Monica Mæland legger fram forslag til ny kommunelov.

II VUOLLÁN: Gielddaministtar Monica Mæland áigu bágget Finnmárkku ja Romssa ovttastahttit stuorra regiovdnan.

Foto: Vidar Ruud / NPK

Fylkkasátnejođiheaddji lea eddon go stáhtaráđđi viggá bágget Finnmárkku ja Romssa ovttastahttit stuorra regiovdnan.

– Ii oktage hálit dákkár bággonáittosdili, muhto Mæland ii beroš das maidige. Min mielas dat lea lobiheapme ja eahpedemokráhtalaš, beaškala Vassvik.

Vassvik dovdá doarjaga álbmogis miehtá Norgga. Finnmárkkus leat 87 proseantta Finnmárkku jienasteaddjin jienastan vuostá dákkár náittosdili.

Stáhtaráđđi ii vuollán, ja lea bovden Finnmárkku ja Romssa ovddasteddjiid dialogačoahkkimii vuossárgga. Muhto Vassvik biehttala oassálastimis.

Muhtumat lohket vuostálastima gártan heahpadin?

– Lehkoset dal nu, muhto mii goit joatkit iežamet vuostálastima, vástida Vassvik.

Ovttasbargošiehtadus dušše beannot jahkái

Muhto mo son de Sámediggi ráhkkana dál dasa go Finnmárkku gielda ii jeagat plánegoahtit ovttasteami Romssa fylkagielddain?

Ja mo ráhkkana ovttasbargu dainna stuora davvi fylkkain, erenoamážit go ovttasteapmi lea nu váttis?

Keskitalo ja Vassvik leaba ovtta oaivilis joatkkit, nannet ja ođasmahttit Sámedikki ja Finnmárkku ovttasbargošiehtadusa mii lea doaibman 2003 rájes. Ulbmil lea nannet sámi giela, kultuvrra, ealáhusaid ja servvodagaid.

Muhto ođđa šiehtadus maid buriin mielain vuolláičáliiga, doaibmá dušše 2019 loahpageahčái. Dan rájes oainnat Finnmárku fylkkagielda sáhttá leat šaddan historján jus gielddaministtar oažžu nu mo háliida.

– Danin mii eat leat sáhttán plánet guhkit áigái, čilge Keskitalo ja dovddaha dán buktán stuorra eahpesihkkarvuođa.

Váilo guhkit áiggi strategiija

Son ii loga Sámedikkis leat vuos makkárge strategiija mo oažžut ovttasbargošiehtadusa stuorra regiovnnain jus dat mihttu ollašuvvá.

– Nu guhká go Finnmárkku fylkkagielda biehttala ovttastahttomis Romssain, de mii Sámedikkis dál eat dieđe ođđa stuorra-regiovnna hárrái geaiguin galggašeimmet ráhkkanit ovttasbargagoahtit, čilge Aili Keskitalo.

– Suorggahahtti

Muhto son ii jáhke Sámediggái šaddat váddásabbon dahkat ovttasbargošiehtadusa stuorra-regiovnnain go sis lea dálá fylkkagielddain.

– Iešalddis ii oro leamen nu ahte sámi áššiid dáfus lea váddásat bargat ovttas Romssain go Finnmárkkuin. Mis lea buorre ovttasbargu guktuin. Muhto vuostemielalašvuohta ovttasbarggu dáfus, mii dál lea čuožžilan Romssa ja Finnmárkku gaskii, suorggahahttá, dovddaha Keskitalo.

Ásahit sierra lávdegotti

Ragnhild Vassvik møtte Erna Solberg etter folkeavstemninga

Fylkkasátnejođiheaddji Ragnhild Vassvik doaivu ahte stáhtaministtar Erna Solberg bisseha Finnmárkku ja Romssa náitinplánaid.

Foto: Ketil Steigen/Finnmark fylkeskommune

Fylkkasátnejođiheaddji Ragnhild Vassvik ii loga Finnmárkku fylkkagielddas ge leat dál makkárge strategiija stuorra regiovnna hárrái. Dattetge ii jáhke leat váttis oažžut ovttasbargošiehtadusa Sámedikkiin jus Finnmárku ovttastahttojuvvo Romssain.

– Nu go Finnmárkkus de ii Romssasge leat leamaš makkárge vuosteháhku bargat ovttas Sámedikkiin. Ovttasbargu Sámedikki hárrái, sáhttá vel nannejuvvot jus šaddá stuorra regiovdna, oaivvilda Vassvik.

Muhto dássážii sii eai leat vuos ráhkkanan dasa.

– Fertet vuos oaidnit mii geavvá ovttastahttináitagiin. Jus Mæland áigumuš ollašuvvá, de han mii dalle fertet ásahit sierra lávdegotti man bargun lea gávnnahit mot ovttasbargu galgá dáhpáhuvvat Sámedikkiin, čilge Vassvik.

– Báhkka politihkalaš ášši

Sámediggepresideanta dovddaha ášši šaddan oalle báhkka politihkalaš áššiin.

– Nu guhká go ii leat čielggas makkár fápmudusaid ja bargguid ođđa regiovdna mielddisbuktá, de Sámedikki beales eat sáhte nu olu ráhkkanit ovttasbarggu hárrái, lohká Keskitalo.

Fylkkasátnejođiheaddji Ragnhild Vassvik oassálastá ealáhusseminárii maid Olgešbellodat lágida Hurtigrutenis Gilivuonas Honnesváhkái. Dáppe lea maid stáhtaministtar Erna Solberg doaivu (O), ja Vassvik doaivu beassat doallat suollemas čoahkkima stáhtaministariin ovttastahttima birra.

– Mus lea ain doaivva ahte stáhtaministtar loahpaha bággonáittosdili maid gielddaministtar Monica Mæland háliida, lohka Vassvik.