Golmma háve lea Turi Dimpas fitnan ovttas isidin Filippiinnain. Dán jagi deaivvai son doppe ávvudit juovllaid, ja lea ge fuomášan ahte lea stuorra erohusat Norgga ja Filippiinna juovlaávvudeamis.
– Láven jurddahallat ahte leat stuora erohusat, ja stuorámus erohus gal lea dat mii guoská skeaŋkkaide.
Eará juovlavierut
Norggas leat skeaŋkkat stuorra oassi min juovlaávvudeamis ja dása illudit ge máŋga máná. Nu ii leat Filippiinnain.
– Min guovllus lea šaddan nu ahte skeaŋkkat leat dehálepmosat juovllaid ja mii oastit ollu skeaŋkkaid. Dáppe ii leat nu ollu diet vierru. Dáppe háliida bearaš čoahkkanit ja ávvudit juovllaid ovttas.
Vaikko leat muhtin erohusat, de sáhttá maid buohtastahttit sin vieruid min vieruiguin.
ERENOMÁŠ: Dál lea Anne Lene Turi Dimpas oaidnán movt Filippiinnain ávvudit juovllaid, – Somá oaidnit sin vieruid, lohká son.
Foto: Ewa-Mari Hedman / NRK– Filippinnain lea maid nie movt Sámis. Dáppe leat stuorra bearrašat ja buohkat háliidit leat čoahkis. Die lea hui dehálaš seammaláganvuohta. Dat ii leat nu ahte go mii dáppe ávvudat juovllaid, de mii leat dušše golmmas. Dáppe leat álohii fuolkkit obbaáigge láhkosis.
Erohusat ekonomaš dilis lea maid mielde váikkuheamen muhtin bearrašiid juovllaide. Ovtta dálus sáhttet leat muhtin skeaŋkkat, muhto eai fal nu máŋga. Ja eará dáluin ges eai oba leat ge skeaŋkkat.
– Go mu guoimmi fuolkkit ledje čoahkkanan ja mánát ožžo ovtta skeaŋkka, sii ledje nu movttegat dainna skeaŋkkain. Lei nu somá oaidnit sis dan ilu.
– Jurddašin dušše ahte ja ja, min guovlluin leat juovlamuorat ja 20-30 skeaŋkka. Dáppe ledje nu duhtavaččat ovttain skeaŋkkain ja dan gal lei hui somá oaidnit, loahpaha Turi Dimpas.
