NRK Meny
Normal

Filbmafestivála nanne sámi identitehta

Skábmagovat filbmafestivála Anáris lea hui dehálaš guovllu ássiide danin go dat gilvá ollu dieđuid máilmmi álgoálbmogiid birra ja festivála leat maid mielde nannemin sámi identitehta.

Petteri Laiti

Petteri Laiti

Foto: Arne Ivar Johnsen

Dán mánu 26. beaivvi rájes 29. beaivái lágiduvvo Skábmagovat filbmafestivála Suoma bealde sámis, Anáris. Dán jagi čájehuvvojit dat buoremus maori filmmat ja ođđa bálkkašuvvon sámi filmmat. Duojár Petteri Laiti, gii ássá Anáris, lohká ahte go olmmoš beassá oaidnit ja dovdat ahte gullá máilmmi álgoálbmogiid searvái de han dat maid lea mielde nannemin sámi identitehta. Su mielas lea Skábmagovat filbmafestivála mávssolaš go doppe beassá oaidnit ja gullat mii eará guovlluin máilmmis dáhpáhuvvá.

Dihtormáilmmis duođalaš eallimii

Petteri Laiti lohká olbmuid dán áigge eanas čohkkát dihtora duohken gos hárjánit eambbo gulahallat dihtoriin go ealli olbmuin.

– Dán áigge olbmot eai šat jođe dálus dállui danin go leat čatnasan dihtor- ja interneahta máilbmái ja dalle han eai astta deaivvadit ja háleštit muhto dákkár dáhpáhusa oktavuođas sáhttá lonuhallat ja deaivvadit earáiguin nu ahte dat eai leat dušše heajat ja hávdádusat gos deaivvadit muhto beassá ná muđuige dákkár oktavuođain oaidnit viidábut fulkkiid ja eará guovllu olbmuid, lohká duojár Petteri Laiti.

Filmmat máŋgga gillii lea buorre

Duojár Petteri Laiti muitá iežas skuvlavázzima Gáregasnjárggas gos ii lean lohpi hállat sámegiela skuvlabáikkis. Nubbi lea ahte ii han eaŋgalasgiela ge lean álki oahppat nu ahte son gárttai de loahpas birget suoma- ja sámegielain. Go juo Suopma dál lea 100 jagi de Skábmagovat festiválas čájehit filmmaid suoma-, eaŋgals- ja sámegillii. Dasa Petteri Laiti liiko go viimmat beassá vásihit filmmaid gillii maid ipmirda, sámegillii.