Filbmadahkki vuollána filmmaid rahkadit

Son gohččoduvvo Ima, ja Skábmagovain son čájehii iežas ođđaseamos filmma.

Filbma lea sápmelaš ráppára Amoc birra.

– Son lea áidna ráppár máilmmis gean mun guldalan, dadjá Inger-Mari Aikio.

• Loga maid: – Mis lea olu oahppat earáin

Áidna anárašgiela ráppár

Amoc, dahje Mikkal Antti Morottaja, lea eret Anáris Suomabeale Sámis. Son lea áidna artistta guhte ráppe anárašgillii, ja dat lea Ima mielas hui imaš ja gelddolaš.

– Filmmas mun buvttán ovdan Amoca ráppárin, ja anárašgiela dili, ja mo son buktá ovdan giela dili ráppema bokte.

Maŋemuš filbma

Muhto go NRK Sámi reportár jearrá makkár filmma son boahtte háve áigi ráhkadit, de boahtá ovdan ahte dát filbma lea Aikio maŋemuš filbma.

– Ii goassege, ii mihkkege. Mu filbma kárriára nogai dása dál.

Filbmadahkki ii šat veaje doarrut ruhtadeami ovddas.

– Mun in gille doarrut daid ruhtahommáiguin. Dat lea nu váivi ja váttis.

Suoma TV-kanála YLE ii áigun oastit filmma Amoca birra, dasto lea Aikio dušše tinen 500 euro filmmas, maid son oaččui go mannan geasi čájehuvvui Rittu Riđus.

Dál son áigu dušše čállit.

– Čuvges boahtteáigi

Lihká lei sus jáhkko sámefilmmaid boahtte áigái, go NRK deaivvai su filbmafestiválas Anáris.

– Otne lean fitnan geahččamin Suvi West filmma Sparrooabbán, ja dan filmma maŋŋá in sáhtte eará go dadjat ahte hás lea hirbmat čuvges boahtteáigi, go mis lea nie čeahpes olbmot geat duođaid gillejit ja nákcejit bargat.

Ima lea ráhkadan máŋgalot oanehisfilmmaid, erenoamážit nuoraide ja mánáide.

Eai fuola oanehis filmmaid

Doaibmajođiheaddji Tampere filbma festiválas, Juhani Alainen, duođašta ahte lea váttis oažžut ruhtadeami.

– Ii oktage oastte oanehis filmmaid, dat gal lea jo nu dadjat njuolggadus. YLE soaitá daid čájehit, muhto ii leat vejolaš eallit dietnasiin, dadjá Alainen.

• Loga maid: Čájeha filmma masa eiseválddit eai jáhke